Golovkın-Chaves jekpe-jegi ótpeıtin boldy
ASTANA. QazAqparat - WBA jáne IBO nusqalary boıynsha orta salmaqtaǵy álem chempıony qazaqstandyq Gennadıı Golovkın men meksıkalyq Hýlıo Sezar Chaves-kishi arasyndaǵy jekpe-jek ótpeıtin boldy. Bul týraly eki boksshynyń promoýterleri habarlady, dep jazady vesti.kz.
Top Rank basshysy Bob Arýmnyń aıtýynsha, eki jaqtyń arasyndaǵy kelissózder toqtatyldy, endi eki boksshy da óz baǵyttary boıynsha ketedi. Deı turǵanmen, Chaves (48-1-1, 32 KO) AQSh-ta 19 shildege josparlanǵan Golovkınmen (29-0, 26 KO) jekpe-jekke múddeli boldy, biraq onyń suraǵan gonoraryna Top Rank-tiń shamasy kelmedi. "Chaves Golovkınmen qolǵap túıistirgisi keldi, biraq qoıǵan talaptary tym aýyr. Sondyqtan biz bul jekpe-jekti qazir uıymdastyra almaımyz», - deıdi Arým. Golovkın - Chaves jekpe-jegi bolmaıdy degen aqparatty qazaqstandyq boksshynyń promoýteri de rastady. Tom Lefflerdiń aıtýynsha, qazir olar HBO telearnasymen kelissózder júrgizip jatyr. Jáne olar shildedegi jekpe-jek úshin eń myqty qarsylastardy izdestirýde. Ázirshe mundaı úmitkerlerdiń qatarynda WBO nusqasy boıynsha orta salmaqtaǵy álem chempıondary Pıter Kýıllın men Denıel Djeıkobs qarastyrylýda.
