Golovkın Brýkpen jekpe-jekte rekordtyq syıaqy alady
ASTANA. QazAqparat - Gennadıı Golovkınniń Kell Brýkpen jekpe-jekte alatyn syıaqy somasy belgili boldy, dep habarlady Sports.kz.
Daily Star aqparatyna sáıkes, Gennadııdiń syıaqysy 3 mıllıon fýntty (4 mıllıon AQSh dollarynan astam) quraıdy.
Golovkınniń qarsylasy Brýk te jekpe-jekte sondaı soma alatyny habarlandy. Eki boksshynyń da mundaı syıaqy kólemi rekordtyq kórsetkish bolmaq.
Sportshylar Londonda jekpe-jek aldyndaǵy ashyq jattyǵýyn ótkizgenin atap ótemiz.
Eske salsaq, 10 qyrkúıekte WBA (Super), IBO, WBC jáne IBF tujyrymdary boıynsha álem chempıony Gennadıı Golovkın (35-0, 32 KO) jartylaı orta salmaqtaǵy IBF chempıony Kell Brýkke qarsy jekpe-jekte ataqtaryn kezekti qorǵaıtyn bolady. Boks keshi Londonda 20 myń kórermen sııatyn 02 arenasynda ótedi.
Tikeleı efırde «Qazaqstan» jáne KazSport telearnalary kórsetedi. Bul jekpe-jek Astana ýaqyty boıynsha saǵat 00.00-de bastalady.
