Golovkın Borattan Qazaqstannan shyqqan eń tanymal adam ataǵyn tartyp aldy - boksshy Maklın
ASTANA. QazAqparat - Brıtanııa boksshysy Metıý Maklın ESPN telearnasyna bergen suhbatynda qazaqstandyq Gennadıı Golovkınmen taǵy da rıngte kezdeskisi keletindigin málimdep, «Qazaqstandyq boksshy Borattan Qazaqstannan shyqqan eń tanymal adam ataǵyn alyp qoıdy», - dep qaǵytypty. Bul týraly Vesti.kz-ke silteme jasap Sport jáne dene shynyqtyrý isteri komıteti habarlady.
«Eger men álem chempıony ataǵyna qol jetkizsem, onda meniń Golovkınmen qaıtadan kezdeskim keledi. Men ony uryp tastaıtynyma senimdi emespin. Óıtkeni ony orta salmaqtaǵy álemniń eń úzdik boksshysy dep sanaımyn. Biraq men onyń kózine kók shybyn úımeletip, qarsylyq kórsete alamyn. Ótken joly men ondaı qarsylyq kórsete almaǵan edim. Onymen jekpe-jekke shyǵý úshin taǵy da bárin ortaǵa qoıar edim. Gennadıı Golovkın endigi Borattan Qazaqstannan shyqqan eń tanymal adam ataǵyn alyp aldy. Eger ol osy betinen qaıtpasa, onda salmaq dárejesine qaramaı eń úzdik boksshy atanǵan Floıd Meıvezer-kishini de taǵynan aýystyrady», - dep málimdedi Maklın.
Esterińizge sala keteıik, Gennadıı Golovkın men Metıý Maklın rıngte 2013 jyldyń 30 maýsymynda kezdesken. Onda Qazaqstan boksshysy brıtandyqty úshinshi mınýtta-aq nokaýtqa túsirgen.
Aıta keteıik, Golovkın kelesi jekpe-jegin 18 qazan kúni meksıkalyq Marko Antonıo Rýbıomen ótkizedi. Qazaqstanda bul jekpe-jekti KazSport telearnasynan, 19 qazan kúni tańerteńgi saǵat 08:30-da kórýge bolady.
