Golovkın: «Belbeýimdi ózime berińder, maǵan belbeýim kerek»
ASTANA. QazAqparat - Orta salmaqtaǵy WBA (Super), IBO, WBC (Interim) jáne IBF nusqalary boıynsha álem chempıony Gennadıı Golovkın (35-0, 32 KO) amerıkalyq boksshy Domınık Ýeıdpen bolǵan kezdesýden soń, Saýl "Kanelo" Alvarestiń enshisindegi WBC tıtýlyn jeńip alýǵa nıetti ekendigin málim etti.
Aıta keteıik, búgin Los-Andjeleste «Forým» arenasynda Gennadıı Golovkın (35-0, 32 KO) amerıkalyq boksshy Domınık Ýeıdti 2-shi raýndta nokaýtpen jeńgen bolatyn.
«Meniń Kalıfornııadaǵy jankúıerlerime, Qazaqstandaǵy jankúıerlerime de úlken alǵys aıtamyn. Jurtyma rahmet! Men ózimdi keremet sezinemin, meniń komandama rahmet», - dedi G.Golovkın jekpe-jekten keıingi suhbatta.
Alvares-Han kezdesýinen soń, qandaı josparlaryń bar degen saýalǵa Golovkın: «Kim jeńetini mańyzdy emes. Tek meniń belbeýimdi ózime berińder, ol belbeý maǵan kerek. Men daıynmyn», - dep jaýap qaıyrdy.
Qazaqstandyq boksshy kelesi kezdesýinde 7 mamyrda ótetin Saýl Alvares-Amır Han jekpe-jeginiń jeńimpazymen judyryqtasýy tıis. Sebebi Golovkın IBF/IBO/WBA tujyrymdary boıynsha álem chempıony ári WBC nusqasy boıynsha álemniń ýaqytsha chempıony, sondyqtan ol Alvarestiń WBC chempıondyq tıtýlyna mindetti úmitker sanalady. Alaıda Saýl Alvares komandasy orta salmaq aıasynda (160 fýnt) qazaqstandyq boksshymen aıqas ótkizýge nıetteri joq ekendikterin baıqatty.
Domınık Ýeıdpen bolǵan jekpe-jekte GGG qatarynan 16-shy ret chempıondyq beldikti qorǵap qaldy. Osylaısha, Gennadıı óz zamanynda orta salmaqta 20 aıqasta belbeýin qorǵap shyqqan Bernard Hopkınstiń rekordyna jaqyndap qaldy. Bul jekpe-jekke Gennadıı Golovkın barlyq belbeýlerin - WBC (Interim), WBA, IBF, IBO tikken.
Osylaısha, jerlesimiz kásipqoı boksta ótkizgen 35 jekpe-jektiń barlyǵyn jeńispen aıaqtap otyr, onyń 32-si - nokaýt.
