Golovkın basqaratyn World Boxing mańyzdy reıtıngte joǵarylady
ASTANA. KAZINFORM — Halyqaralyq boks federatsııasy World Boxing jazǵy olımpıadalyq sport túrleri boıynsha halyqaralyq federatsııalar qaýymdastyǵynyń (ASOIF) jańa baǵalaýynyń nátıjesinde basqarý sapasynyń kórsetkishterin arttyrdy, dep habarlaıdy UOK resmı saıtyna silteme jasap.
2026 jyldyń naýryz aıynda jarııalanǵan aldyńǵy baǵalaýmen salystyrǵanda World Boxing 35 upaıǵa joǵary nátıje kórsetti. Osylaısha uıymnyń kórsetkishi 117-den 152 upaıǵa deıin ósti.
Jańa kórsetkish ASOIF-tiń basqarý máseleleri jónindegi jumys toby qaýymdastyrylǵan músheler úshin belgilegen 135 upaılyq mejeden de, tolyqqandy múshelerge qoıylatyn 150 upaılyq talaptan da joǵary. Baǵalaý nátıjesinde World Boxing ASOIF-tiń basqarý sapasy jónindegi jikteýinde C tobynan B tobyna kóterildi.
Baǵalaý World Boxing uıymy tamyz aıynyń sońynda usynǵan qujattar negizinde júrgizildi. Materıaldardy I Trust Sport uıymy táýelsiz túrde tekserdi. World Boxing barlyq bes baǵyt boıynsha nátıjesin jaqsartqan: ashyqtyq, adaldyq, demokratııa, damý men turaqtylyq, sondaı-aq baqylaý tetikteri.
Eń joǵary ósim «Ashyqtyq» baǵyty boıynsha tirkeldi. Mundaǵy kórsetkish 31 upaıdan 42 upaıǵa deıin artty. «Baqylaý tetikteri» boıynsha nátıje 19-dan 27 upaıǵa, adaldyq boıynsha 23-ten 29 upaıǵa, demokratııa boıynsha 32-den 37 upaıǵa, al damý men turaqtylyq boıynsha 12-den 17 upaıǵa ósti.
— Bul nátıje boıymyzǵa senim uıalatady, óıtkeni ol World Boxing uıymynyń basqarý júıesi men ınstıtýtsıonaldyq qurylymyn nyǵaıtýdaǵy naqty ilgerileýdi kórsetedi. Biz az ýaqyttyń ishinde halyqaralyq federatsııaǵa degen senim men onyń tıimdi jumys isteýi úshin mańyzdy baǵyttardyń barlyǵynda aıtarlyqtaı alǵa jyljydyq. Sońǵy baǵalaý qol jetkizgen jetistikterimizdi aıqyn ári táýelsiz túrde dáleldep berdi. Endigi meje — osy qarqyndy saqtaı otyryp, áli de jetildirýdi qajet etetin tustarǵa basa mán berý. Sonymen qatar engizilgen ózgeristerdi uıymnyń kúndelikti jumysynyń turaqty bóligine aınaldyrý óte mańyzdy. Bul myqty ári senimdi, bolashaqtyń talaptaryna saı jumys isteıtin federatsııa qurý úshin qajet. Sondaı-aq sportshylardyń, ulttyq federatsııalardyń jáne búkil Olımpıada qozǵalysynyń World Boxing uıymyna degen senimin arttyrý mańyzdy, — dedi World Boxing prezıdenti Gennadıı Golovkın.
ASOIF qorytyndy baǵany shyǵarý kezinde halyqaralyq federatsııanyń jumysyna naqty engizilip, iske asyrylǵan sharalar men tetikterdi ǵana esepke aldy. Al ázirleý nemese daıyndyq kezeńindegi bastamalar sońǵy nátıjege kirgen joq.
Bul nátıjeler World Boxing uıymynyń 2026 jylǵy Kongreske daıyndyǵy kezinde jáne 2028 jyly Los-Andjeleste ótetin Olımpıada oıyndaryna deıingi jumysynda eskeriletin bolady.
Júrgizilip jatqan reformalar Halyqaralyq Olımpıada komıtetiniń Olımpıada qozǵalysyn 2032 jylǵa deıin damytýǵa arnalǵan negizgi baǵyttardy aıqyndaıtyn «Fit for the Future» strategııasymen de úndesedi.
Osyǵan deıin Gennadıı Golovkın Ulttyq ulan mýzeıine boks qolǵabyn tabystaǵanyn jazǵanbyz.
