Golovkın aıyrylǵan IBF beldigine kimder talasady

ASTANA. QazAqparat - Halyqaralyq boks federatsııasy (IBF) reıtıngindegi birinshi jáne úshinshi oryndaǵy ýkraınalyq Sergeı Derevıanchenko (12-0, 10 KO) men amerıkalyq Denıel Djeıkobstyń (34-2, 29 KO) arasyndaǵy orta salmaqtaǵy bos tıtýldy oınatý týraly sheshim qabyldady, dep habarlaıdy «SPORTINFORM» SAA.

IBF qazaqstandyq Gennadıı Golovkındi (38-0-1, 34 KO) mindetti qarsylasy Derevıanchenkomen judyryq túıistirýden bas tartqany úshin tıtýlynan aıyrý týraly sheshim shyǵarǵany belgili.

Dúısenbi kúni IBF shtab-páterinen Derevıanchenkonyń so-promoýteri Lý Dıbellaǵa (DiBella Entertainment) jáne Djeıkobstyń promoýteri Eddı Hernge (Matchroom Boxing) jedel kelissózder júrgizýge usynys tústi. Taraptar 11 shildege deıin kelispese, promoýterlik saýda-sattyq belgilenetin bolady.

Іs promoýterlik saýda-sattyqqa deıin jetetin bolsa, júlde qory boksshylar arasynda teń bólinedi.

Aıta keteıik, Derevıanchenko men Djeıkobstyń menedjerleri ǵana emes, bapkerleri de bir, olar amerıkalyq Andre Rozeniń qaramaǵynda.

Sonymen qatar, Saýl Alvarespen qyrkúıekte ótetin kezdesýde Djeıkobs múmkin qarsylas retinde qarastyrylýda. Amerıkalyq boksshydan ózge, Saýldiń komandasy Gennadıı Golovkınmen kelissóz júrgizýdi jalǵystyryp jatyr.