Golovkın At sporty Federatsııasynyń prezıdentimen kezdesti
ASTANA. KAZINFORM – Búgin Qazaqstan Ulttyq Olımpıadalyq komıtetiniń basshysy Gennadıı Golovkın QR At sporty federatsııasynyń prezıdenti Rýstam Baıalıevpen kezdesti. Bul týraly Qazaqstan Respýblıkasynyń At sporty Federatsııasynyń baspasóz qyzmeti habarlady.
Eki jaq Qazaqstandaǵy at sportynyń damýy, halyqaralyq jarystarǵa qatysatyn sportshylardy daıarlaý men qoldaý máselelerine toqtaldy.
Sondaı-aq ınfraqurylymdy damytý, ulttyq quramanyń daıyndyq deńgeıin jaqsartý jáne at sportynyń áleýetin arttyrý týraly aıtyldy. Olımpıadalyq at sporty túrleriniń mártebesin kóterýge jáne eldiń halyqaralyq arenadaǵy bedelin nyǵaıtýǵa baǵyttalǵan bastamalardy júzege asyrýǵa erekshe nazar aýdaryldy.
Kezdesýde aldaǵy is-sharalar, At sporty federatsııasy komandasyn týrnırlerge daıyndaý jáne halyqaralyq yntymaqtastyqty keńeıtý jónindegi josparlar talqylandy.
– Memleket basshysy Qasym-Jomart Toqaevtyń qoldaýymen Qazaqstan Dúnıejúzilik kóshpendiler oıyndaryn abyroımen ótkizdi. Prezıdent kóshpendilerdiń jahandyq damý úderisine qosqan úlesin joǵary baǵalady. Qazaqstan úshin at sporty – bul ulttyq mura jáne álemdik arenaǵa shyǵýdyń mańyzdy qadamy. Bizdiń maqsatymyz – elimizdiń halyqaralyq saıystardaǵy ornyn nyǵaıtý, jas daryndylardyń ósýine jaǵdaı jasaý, at sporty túrlerin keńirek nasıhattap, deńgeıin kóterip, ony álemde básekege qabiletti etý, - dep Rýstam Baıalıev, ulttyq qundylyqtardy halyqaralyq arenada pash etý mańyzdy mindetterdiń biri ekenin erekshe atap ótti.
Eske sala keteıik, búǵan deıin Qazaqstan UOK Atqarýshy komıtetiniń jańa quramy bekitilgenin jazǵan edik.