Golovkın Almatydaǵy JOO stýdentterimen kezdesti
ALMATY. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Almaty qalasyndaǵy JOO-nyń stýdentterimen kezdesý ótkizdi. Bul týraly UOK habarlady.
Іs-shara ashyq formatta ótti. Golovkın tájirıbesimen jáne qazirgi qyzmetiniń erekshelikterimen bólisti. UOK prezıdenti halyqaralyq qatynastardyń damýy, sporttyq bastamalardy ilgeriletý jáne eldiń halyqaralyq deńgeıdegi ımıdjin nyǵaıtý baǵytynda atqarylyp jatqan jumystar týraly aıtty.
Sóz barysynda Gennadıı Golovkın sporttyq mansabyndaǵy negizgi kezeńderge toqtalyp, jeke ustanymdary men kásibı tártip onyń ómirindegi jáne qazirgi qyzmetindegi basty baǵdar ekenin atap ótti.
– Búgin osynda bolý men úshin úlken qýanysh. Sizder – bizdiń elimizdiń bolashaǵysyzdar. Qazir óz jolymdy saralaı kele, naqty aıta alamyn — bári de múmkin. Alaıda ár jetistiktiń artynda tek qana daryn pen arman emes, sonymen birge kúndelikti eńbektený, tártip jáne eńbekqorlyq turady. Ýnıversıtet qabyrǵasynda tek bilim alyp qana qoımaı, ózderińizdi tanýǵa jáne kim bolǵyńyz keletinin uǵynýǵa tyrysyńyzdar. Ózderińizdi adal, júıeli túrde qalyptastyryp, óz kúshińizge senýdi umytpańyzdar. Jańalyq ashýǵa degen umtylysty, ósýge degen shabytty joǵaltpańyzdar. Sonymen qatar bilimge degen qushtarlyq pen maqsatqa jetýdegi batyldyqty saqtańyzdar, - dedi ol áńgime barysynda.
Kezdesý aıasynda Golovkınge atalǵan joǵary oqý ornynyń Qurmetti doktory ataǵy resmı túrde tabystaldy. Bul ataq onyń Qazaqstannyń halyqaralyq bedelin nyǵaıtýǵa qosqan eleýli úlesi úshin berildi. Aıta keteıik, halyqaralyq akademııalyq tájirıbede mundaı qurmetti dáreje qoǵam, mádenıet jáne halyqaralyq baılanystardyń damýyna aıryqsha yqpal etken erekshe eńbegi úshin tabystalady. Gennadıı Golovkınniń jetistikteriniń arqasynda mıllıondaǵan adam Qazaqstannyń qundylyqtary men áleýeti týraly bildi.
– Gennadıı Golovkınge Qurmetti doktor ataǵyn tabystaý — biz úshin úlken mártebe. Ol — Qazaqstannyń álemdik arenadaǵy sımvolyna aınalǵan tulǵa. Golovkın tek kásibı sportta joǵary nátıjege jetip qana qoımaı, elimizdiń shet eldegi elshisi bola bildi. Onyń ómir joly shabyttandyrady, al esimi álemde zor qurmetke ıe. Mundaı tulǵalar Qazaqstannyń zamanaýı beınesin jahandyq deńgeıde qalyptastyryp otyr, - dedi ýnıversıtet prezıdenti, doktor Chan Ian Beng.
Aıta keteıik, buǵan deıin Gennadıı Golovkın elordadaǵy joǵary oqý oryndarynyń stýdentterimen kezdesip, óz tájirıbesimen bólisip, jastarǵa aqyl-keńes aıtqan bolatyn.