Golovkın áli eshkimdi 100 paıyz kúshimen urǵan joq - Abel Sanches
ALMATY. QazAqparat - WBA nusqasy boıynsha (Super) orta salmaq dárejesindegi álem chempıony 32 jastaǵy qazaqstandyq boksshy Gennadıı Golovkın aldaǵy 26 shildede AQSh-ta osy salmaq dárejesi boıynsha álemniń eks-chempıony 33 jastaǵy avstralııalyq boksshy Denıel Gılmen bolatyn kezdesýde óz ataǵyn qorǵaıdy. Osy aldaǵy kezdesý jaıynda Gennadııdiń bapkeri Abel Sanches óz oılaryn ortaǵa salǵan edi.
«Men bapker retinde, Denıel Gıl týraly ýaıym jemeımin, men Golovkındi ýaıymdaımyn, - dedi Sanches ESNEWS portalyna bergen suhbatynda, - Eger de men Golovkındi rıngke naǵyz babynda shyǵara alsam, onda Gıl bola ma, basqa bola ma bizge qarsy tura almaıdy. Gıldiń artyqshylyqtary kóp, kemshiligi az. Biraq eger Gennadıı Golovkın bar kúshin salsa, onda Gıldiń rıngte ne istep, ne qoıatyny biz úshin mańyzdy bolmaı qalady. Bálkim maǵan senbessizder, biraq Golovkın osy kúnge deıin áli eshbir jekpe-jekte birde-bir soqqysyna júz paıyz kúshin salǵan emes. Rıngte, sparrıngterde kórgenderime qarap aıtar bolsam, ol áli eshkimdi bar kúshimen urǵan emes. Munyń qajeti de joq, óıtkeni oǵan teń keler qarsylas áli shyqqan joq. Kim biledi, múmkin Gıl dál sondaı qarsylas bolar. Men budan 4 jyl buryn Golovkınmen alǵash ret «lapaǵa» turǵanymda, onyń soqqylary meni aıaǵymnyń baqaılaryna deıin shymyrlatty. Ol meni qatty urǵan da joq, biraq men: «Mássaǵan, mine soqqy! Qudyretti kúsh degen osy shyǵar, sirá» - dep oıladym. Bul onyń tabıǵı kúsh-qýaty, biraq bul, sonymen qatar, tehnıka, taımıng, balans. Árıne, kóp eńbektiń, belgili bir ádisterdiń, jattyǵýlardyń arqasynda soqqynyń qýatyn arttyrýǵa bolady, biraq Qudaı bergen kúshke jetpeıdi. Jáne ol óziniń bul darynyn durys jolda paıdalanyp keledi», - dedi óz sózinde Gennadııdiń bapkeri.
Qoryta kele aıtar bolsaq, AQSh jerinde rıngke alǵashqy shyqqan kezinen bastap áli kúnge deıin birde-bir qarsylas Gennadııge laıyqty qarsylyq kórsete almaǵan. Túptep kelgende, Golovkın áli bir de bir raýnd jeńilip kórgen joq. Abel Sanches Denıel Gıldiń tabandylyq kórsetetindigine, al Golovkınniń burynǵy jekpe-jekterge qaraǵanda bul joly óziniń san qyrly sheberlikterin kórsete alatyndyǵyna úmit artýda. «Gıl - laıyqty qarsylas. Múmkin ol Gennadııdi sońǵy raýndtarǵa jeteleıtin shyǵar. Kim biledi, múmkin Gennadııge bul joly kóp bokstasýǵa, kóp qorǵanýǵa týra keletin shyǵar. Kóremiz», - dedi Abel Sanchas.
