Golovkın Alvarespen sharshy alańda kezdesýge daıyn
ASTANA. QazAqparat - Orta salmaqtaǵy WBA (Super), IBO jáne WBC (Interim) nusqalary, sondaı-aq Halyqaralyq boks federatsııasy nusqasy (IBF) boıynsha álem chempıony, qazaqstandyq dańqty boksshy Gennadıı Golovkın óziniń kelesi jekpe-jegin Saýl «Kanelo» Alvares - Amır Han kezdesýiniń jeńimpazymen ótkizgisi keledi. Bul týraly VKontakte áleýmettik jelisindegi «Gennadıı GGG Golovkın» toby habarlaıdy.
Al Alvares-Han kezdesýine kelsek, sarapshylar onyń favorıti retinde kóbinese meksıkalyq boksshyny aıtady. Tıtýldy qorǵaýǵa arnalǵan sharshy alańdaǵy kezdesý 7 mamyrda AQSh-taǵy Las-Vegasta ótedi dep josparlanyp otyr. Onda eki boksshy WBC tıtýly úshin baryn salady. Kezdesý 155 fýnt (70,3 keli) aralyq salmaq aıasynda ótpek.
Eske sala keteıik, jerlesimiz G.Golovkın (35-0, 32 KO) búgingi kúni álemdik boks serııalarynyń WBA, IBO, WBC (Interim) jáne IBF sekildi tórt belbeýiniń ıegeri.
Búgin sýperchempıon, jeńimpaz Gennadıı Golovkın buǵan deıin esh jeńilip kórmegen amerıkalyq Domınık Ýeıdti (18-0, 12 KO) ekinshi raýndta nokaýtqa jiberip, kezekti jeńisine qol jetkizdi. Endi ol 7-mamyrda ótetin kezdesýdiń qaı jeńgenimen shyǵýǵa óziniń daıyn ekenin aıtyp otyr.
