Golovkın-Alvares jekpe-jeginiń jeńimpazymen kezdesýdi qalaımyn - Sonders
ASTANA. QazAqparat - Alaıda ulybrıtanııalyq boksshy Bıllı Djo Sonders (24-0, 12 KO) aldymen 8 shilde kúni ótetin jekpe-jekte WBO belbeýin qorǵap shyǵýy tıis. Atalǵan belbeýdiń mindetti úmitkeri - grýzın Avtandıl Hýrtsıdze (32-2-2, 22 KO), dep xabarlaıdy QazAqparat tilshisi.
Sonders qazaqstandyq boksshy Gennadıı Golovkınge jetispeıtin WBO ataǵyn osymen ekinshi ret qorǵamaqshy. Osydan eki jyl buryn ol ırlandııalyq Endı Lıge qarsy jekpe-jekte óz jetistigin dáleldegen bolatyn. Aǵymdaǵy jyldyń maýsym aıynda Sonders GGG-men judyryqtasady degen jospar bolǵan. Alaıda Golovkınniń komandasy Alvaresti tańdady. Ýaqyt ta tyǵyz boldy. Endi, Bıllı Djo Sonders grýzın boksshysyna qarsy shyǵyp, WBO tıtýlyn taǵy bir ret qorǵap kórmekshi.
«Men aldyn ala boljam jasaı almaımyn. Degenmen, meniń aldaǵy maqsatym - jyldyń aıaǵyna deıin GGG-men, ıa bolmasa, «Kanelomen kezdesý», - deıdi Sonders. Bıllı grýzın Avtandıl Hýrtsıdzeni jeńetinine senimdi.
«Onyń bulshyq etterin alyp tastaıtyn bolsa, onda taza jartylaı jeńil salmaq shyǵa keledi. Menińshe, amerıkalyq bapkerler oǵan bulshyq etterin ósirip berýge kómektesti. Olardyń qandaı ekenin bárimiz de jaqsy bilemiz. Rıngkte ol meniń kóleńkemniń artynan júgirip, djebpen taıaq jeıtin bolady dep oılaımyn. Sosyn men ózime artylǵan mindetti oryndaımyn. Hýrtsıdze qazir 37-de. Men ony jeńe almasam, bokstan ketýim kerek. Golovkın men «Kanelony» da umytýǵa týra keledi. Úsh jyldan keıin Hýrtsıdze 40-qa keledi. Meniń jeti jasar ulym odan jaqsy bokstasady. Shyn aıtamyn», - dedi Sonders 8 shilde kúngi jekpe-jekke arnalǵan baspasóz máslıxatynda.
Aıta keteıik, Golovkın-Alvares jekpe-jeginiń jeńimpazy WBO tujyrymy boıynsha orta salmaqtaǵy álem chempıony Bıllı Djo Sonderspen (24-0, 12 KO) kezdesýi ábden múmkin. Ol jaıynda ulybrıtanııalyq boksshynyńpromoýteri Frenk Ýorren de aıtyp otyr.
GGG-diń promoýteri Tom Lefflerdiń aıtýynsha, Golovkın sońǵy belbeýdi jeńip, absolıýtti chempıon atanǵandy qalaıdy.
