Golovkın-Alvares jekpe-jegi: Úshinshi tóreshiniń ótirigi shyǵyp qaldy
ASTANA. QazAqparat - Boks salasynyń sholýshysy, tanymal reseılik sarapshy Aleksandr Belenkıı "GGG-Canelo" jekpe-jeginde eki boksshyǵa teń upaı bergen úshinshi tóreshiniń áreketin áshkereledi, dep xabarlaıdy QazAqparat tilshisi.
"Shyny kerek, bárimiz Alvarestiń paıdasyna 118-112 esebimen óz sheshimin shyǵarǵan Adelaıda Berdke tap berdik. Árıne, onymyz durys-aq. Degenmen, eki boksshyǵa 114-114-pen teń upaı bergen taǵy bir tóreshi - Don Trellany ábden umytqan sııaqtymyz. Bir qyzyǵy, Don Trella jetinshi raýndty Alvarestiń enshisine berip qoıǵan. Alaıda Adelaıda Berdttyń ózi ol raýndta Golovkın jeńdi dep sanaıdy! Sebebi "Kaneloǵa" anyq berýge kelmeıtin nárseni burmalaýǵa bolmaıtynyn bildi. Sóıtip, jetinshi raýnd sol "berýge kelmeıtin" raýnd edi. Degenmen, Trella báribir berip qoıdy. Ol eseptiń jaýabyn keltirýge tyrysqan tárizdi", - dep jazdy Belenkıı.
Sarapshynyń oıynsha, úsh tóreshiniń birdeı sońǵy úsh raýndty Alvareske berip qoıǵany da kúdik týǵyzady. Sebebi jekpe-jektiń aıaǵynda Saýldiń aıqyn basymdyǵy baıqalǵan joq. Buny soqqylardyń kompıýterlik statıstıkasy da rastap otyr. "Sońǵy úsh raýndta "Kanelo" Golovkınnen artyq soqqy jasamady. Sondyqtan ol raýndtardyń bireýin GGG-ge berýge ábden bolady. Jaraıdy, Trella jetinshi raýndty burmalap tastaǵannyń ózinde esep basqasha shyǵatyn edi. Ekinshi tóreshiniń óz sheshimin 115-113 esebimen Golovkınge bergenin eskersek, ol jekpe-jekte qazaqstandyq boksshy jeńimpaz atanýy qajet", - dep atap kórsetti Belenkıı.
Aıta keteıik, ótken demalys kúnderi AQSh-tyń Las-Vegas qalasynda ótken boks keshinde Gennadıı Golovkın meksıkalyq Saýl "Kanelo" Alvarespen teń tústi.
Dál osy sheshimmen jankúıeler de, sarapshylar da kelispeı otyr. Ásirese, Alvareske 118-110 esebimen jeńis berip qoıǵan Adelaıda Berdtyń esebine narazylyq tanytty.
Aleksandr Belenkııdiń oıynsha, Alvarestiń komandasy xalyqtyń kóńilin basqa jaqqa buryp jiberdi.
