Golovkın-Alvares jekpe-jegi: Genaǵa revanshta utylǵan tıimdi me?
Golovkın men Alvarestiń qarymta jekpe-jegi ótetin data belgili. 5 mamyr - Meksıkanyń ulttyq meıramy. 1862 jyly dál sol kúni Pýeblo qalasyna jaqyn jerde bolǵan shaıqasta meksıkalyqtardyń áskeri quramy jaǵynan az bolsa da, frantsýzdarǵa tótep berip, Napoleon III-niń monarhııalyq rejımin qulatqan eken. Merekeniń ózi «Sınko de Maıo» dep atalady. Bul mereke tarıhı mańyzy jaǵynan Meksıkanyń Táýelsizdik kúnimen para-par. Árıne, Alvareske ol kúni utylýǵa bolmaıdy. Sondyqtan ol baryn salady. Sebebi jeńilip qalsa, ózine de, eldiń namysyna da syn. Degenmen, keıbir sheteldik sarapshylardyń sózine qaraǵanda, Alvares úshin Golovkın sııaqty tórt birdeı belbeýdiń ıegerinen utylý uıat emes, kerisinshe, abyroı. «Kanelo» jeńilse de, meksıkalyqtar ony qatty synamaıdy. Sebebi GGG - orta salmaqtaǵy №1 boksshy. «Iá, Golovkın utsa, Alvarestiń bedeli túspeıdi. Sebebi GGG - orta salmaq dárejesindegi eń myqty boksshy. Bul Denıel Djeıkobs, Djermall Charlo, Demetrıýs Andrade nemese Sergeı Derevıanchenkodan utylǵannan áldeqaıda jaqsy», - deıdi Boxingnews24.com saıtynyń sarapshysy Tım Roıner.
Alaıda máseleniń qos boksshynyń taza ózderine qatysty eki jaǵy da bar eken. Óıtkeni, bul revanshta Gennadıı Golovkın óz qarsylasyn nokaýtpen jeńse, eki boksshy biraz aqshadan qaǵylýy ábden múmkin. Sebebi ondaıda buǵan deıin de talaı boljanǵan úshinshi jekpe-jek ótpeı qalady. «Osy joly Golovkın «Kanelony» aýyr nokaýtqa túsirse, úshinshi jekpe-jek ótpeýi de múmkin. Golden Boy Promotions táýekelge barmaı, óz boksshysyn saqtap qalýǵa tyrysady. Sol sebepti basqa qarsylastardy izdeıdi. Al GGG nokaýtqa túsip qalsa, onda ol «Kaneloǵa» qarsy taǵy bir jekpe-jek - úshinshi aıqasty ótkizýge tyrysady», - dep jazdy Tım Roıner.
Shyny kerek, Alvares qatty jaraqat alyp qalsa, ózi de, komandasy da tabystan aıyrylatynyn jaqsy biledi. Sondyqtan ońbaı utylǵan jaǵdaıda úshinshi jekpe-jekti ótkizbeı, basqa jolmen kete beredi. Alvares nebári 27 jasta. Ol áli de ýaqytty soza alady. Bul turǵydan 35 jastaǵy Golovkın úshin trılogııany erterek ótkizgen tıimdi ekeni aıdan anyq.
Sonda ne isteý kerek?
Alvaresti nokaýtpen jeńse, GGG úshinshi jekpe-jektiń gonorarynan aıyrylady. Bul az qarajat emes. Osy rette GGG qatardaǵy qarsylastarmen eki-úsh ret kezdeskenshe meksıkalyq boksshymen bir ret shyqsa, densaýlyqqa da, qaltaǵa da paıdaly ekenin jaqsy túsinedi. Biraq úshinshi jekpe-jek úshin Genaǵa namysty qaltaǵa sala turyp, utylý kerek deıdi sarapshylar. ıAǵnı, utyla salý kerek. Biraq, ondaı bolsa tórt birdeı belbeýden aıyrylady. Al Gena utyldy delik, endi «Kanelo» úshinshi jekpe-jekti ótkizbeı, birden WBO chempıony Bıllı Djo Sonderske bet alsa, qaıtemiz? Sóz joq, Alvares ýaqytty sozýǵa tyrysady. Sebebi bir-eki jyldan keıin Golovkınge qarsy bokstasýdyń jeńildeı túsetinin jaqsy biledi. Aıtpaqshy, revanshqa qatysty kelisimshartta úshinshi jekpe-jekti ótkizý mindeti jazylmaǵan eken. Sondyqtan Alvaresti trılogııaǵa mindetteý qıynǵa soǵatyn sııaqty.
Búginde Gennadıı Golovkın de, onyń promoýteri Tom Leffler de úshinshi jekpe-jekti birden uıymdastyrý jeńil emes ekenin jaqsy túsinedi. Sodan bolar, aldaǵy aıqas GGG úshin sátti aıaqtalsa, orta salmaqtaǵy barlyq tıtýldardy biriktiremiz dep otyr. «5 mamyrda ótetin jekpe-jektiń sharttary talqylanǵanda naqty bir kelisim bolǵan. Revanshta kim jeńedi, úshinshi jekpe-jek óte me, joq pa, sol sheshetin bolady. Degenmen, úshinshi jekpe-jektiń máselesi sheshilse de, biz ony birden ótkizbeımiz. Golovkın jeńgen jaǵdaıda kelesi aıqasta WBO chempıony Bıllı Djo Sonderske qarsy shyǵatyn bolady», - deıdi T.Leffler. Onyń aıtýynsha, revanshtan keıin Gennadıı Golovkın taǵy eki jekpe-jekti ótkizýge tyrysady.
Sonymen, meksıkalyq boksshyny nokaýtpen jeńgen bir jaǵynan tıimsiz. Al nokaýtsyz jeńe alamyz ba? Sarapshylardyń aıtýynsha, «Kanelony» tóreshilerdiń sheshimimen jeńý qıyn bolady. Oǵan qosa, aldaǵy revansh qaıtadan Las-Vegasta ótse, Adelaıda Berdtiń tóreshilik jasamaıtynyna kim kepil? Sol kelinshektiń ózi revanshta tóreshilik jasamasa da, úsh tóreshiniń ishinde Don Trella sııaqty adamdardyń otyrǵany esepti buzyp jiberýi ábden múmkin. Sebebi eki tóreshi eki bólek sheshim shyǵaryp, úshinshisi teń upaı berse, revansh taǵy jeńimpazsyz aıaqtalady. Gennadıı Golovkınniń jekpe-jekterine kommentator bolyp júrgen Olımpıada chempıony Baqtııar Artaevtyń oıynsha, aldaǵy jekpe-jekte dál solaı bolýy da yqtımal. «Shyny kerek, ekinshi jekpe-jekke de obektıvti turǵyda qaraý qajet qoı. Aldaǵy revansh taǵy da teń aıaqtalatyn sııaqty. «Nege?» degen suraqqa jaýap bermeı-aq qoıaıyn, biraq bul - meniń jeke oıym, boljamym, kózqarasym. Jekpe-jek solaı aıaqtalady», - dep kesip aıtady Baqtııar Artaev QazAqparat tilshisine bergen suhbatynda. Onyń aıtýynsha, revanshtyń sheshimi ótetin jerine baılanysty emes. Ekinshi jekpe-jek Las-Vegasta óte me, Nıý-Iorkte uıymdastyryla ma, báribir boksshylar teń túsedi. Osydan keıin olar úshinshi jekpe-jekti de ótkizbeýi de ábden múmkin. «Osy jolǵy kelisimshartta revansh týraly eshteńe jazylmaǵan. Negizi, ekeýi de óz ataqtaryn saqtap qalsa, úlken abyroı ǵoı. Sondyqtan úshinshi jekpe-jek ótpeýi de múmkin. Revanshta nokaýt bolmaıdy. Óıtkeni ekeýi de myqty boksshy. Kelesi jekpe-jek Las-Vegasta bolatyn shyǵar. Sebebi ol jaqta halyq kóp jınalady. Úlken sharalar jıi uıymdastyrylady», - dep atap kórsetti B.Artaev.
Al Golovkınniń ustazdarynyń biri Ermahan Ybyraıymov revanshta mindetti túrde jeńimpaz bolady dep sanaıdy. «Bul joly teń esep bolmaıdy. Gennadıı bapkerler bergen aqyl-keńesterdi sátti oryndasa, jeńip shyǵady», - deıdi Ermahan Ybyraıymov. Onyń oıynsha, osy joly Alvares qaıtadan ekinshi nómirmen bokstasyp, Golovkınniń soqqylaryn darytpaýǵa tyrysady. Sondyqtan meksıkalyq boksshyny barynsha sharshatý qajet. Sosyn jyldamdyqty kóbeıtken jón. Óıtkeni alǵashqy jekpe-jekte Gennadıı baıaý qımyldady. «Men Genamen Sochıde kezdesip, jaqsylap turyp sóılestim. Alvareske qarsy jekpe-jek boıynsha óz aqyl-keńesimdi berdim. Men aıttym, besinshi raýndqa deıin Alvaresti jan-jaqty zerttep alý qajet. Onyń ázirlep qoıǵan qandaı ádis-tásilderi bar? Sonyń bárin zerttep shyǵý qajet. Oǵan bir raýnd jetkiliksiz. Eki raýnd ta az bolady. Bes raýnd sen ony zertteýiń kereksiń dedim. Sosyn únemi qysym jasap otyrý qajet», - dep atap kórsetti Olımpıada chempıony. Degenmen, sheteldik sarapshylardyń keńesine qulaq assaq, Golovkın birinshi raýndtan bastap óz basymdyǵyn ashyq kórsetýi kerek. Sebebi Alvares birden óz belsendiligin kórsetip, tóreshilerdiń kózine túsip qalsa, Golovkınniń keıingi raýndtardaǵy basymdyǵy baıqalmaı qalýy ábden múmkin. Tóreshiler alǵashqy kózqarastan shyǵa almaıdy degen pikir bar.
Osylaısha, aldaǵy revanshqa qatysty san alýan boljamdar aıtylýda. Degenmen, bir másele anyq, Gennadıı Golovkın orta salmaqtaǵy barlyq tıtýldardy biriktirýge tyrysady. Ol jaıynda GGG óz suhbattarynda da talaı ret aıtty. Olaı bolsa, osy joly Golovkın jeńis úshin baryn salady, birinshi jekpe-jekte qoldanbaǵan ádis-tásilderin iske qosady. Sosyn alǵashqy jekpe-jekte eki boksshy bir-birin ábden zerttep aldy. Demek, aldaǵy revanshta bárimiz tarıhı aıqasty kóre alamyz.
