Golovkın-Alvares trılogııasynan keıin GGG qyrýar tabyspen zeınetke shyqsa da bolady - Robert Garsııa
ASTANA. QazAqparat - Amerıkalyq bapker Robert Garsııanyń oıynsha, Golovkın - Alvares jekpe-jegi bir ǵana kezdesýmen shektelmeıdi, dep habarlaıdy QazAqparat tilshisi.
Al eki boksshynyń barlyq jekpe-jekteri aıaqtalǵannan keıin Golovkın qyrýar tabysqa kenelip, zeınetke shyqsa da bolady.
"Menińshe, qaı boksshy jeńse de, bul úlken jekpe-jek bolady. Odan keıin biz ekinshi jekpe-jekti kóre alamyz. Menińshe, mamyr aıynda revansh bolady. Bálkim, arǵy jaǵy trılogııaǵa ulasýy ábden múmkin. Al osy trılogııadan keıin GGG zeınetke shyqsa da bolady. Sebebi ol qyrýar tabysqa kenele alady. "Kanelo" óz jolyn jalǵastyrady. GGG bolsa, qaltasyna 30 mıllıondy salyp alyp, bokspen qoshtasa alady. Kim biledi, bálkim odan da kóp aqsha tabatyn shyǵar", - deıdi Garsııa.
Aıta keteıik , buǵan deıin Garsııa tanymal boksshy Floıd kishi Meıveızerdiń Golovkınge qarsy aqparattyq shabýyldaryna túsinik bergen bolatyn. "Búginde barlyq jankúıerler Meıveızer qaıta oralsa, onyń Golovkınmen judyryqtasqanyn qalaıdy. Kezinde ol "Kanelony" ońaı jeńgen. Endi, Alvares GGG-di jeńse, Floıd Golovkındi de ońaı jeńemin dep shyǵa keledi. Sebebi kezinde Alvaresti esh qıyndyqsyz jeńgen. Sol sebepti ol meksıkalyq boksshynyń jeńgenin qalaıdy. Floıd ózin oılap otyr", - deıdi Garsııa.
