Golovkın-Alvares revanshynda burynǵy tóreshilik qaıtalanbaı ma
ASTANA. QazAqparat - Meksıkalyq boksshy Saýl Alvarestiń komandasy GGG-ge qarsy revanshty burynǵy jerde ótkizýge múddeli, dep habarlaıdy QazAqparat tilshisi.
«Golden Boy Promotion» kompanııasynyń basshysy Oskar De La Hoııanyń aıtýynsha, Golovkın men Alvares arasyndaǵy qarymta jekpe-jekti ótkizýge «Madison Square Garden» (Nıý-Iork) de, AT&T Stadium (Dallas) de talasyp otyr. Alaıda Alvarestiń komandasy Las-Vegas qalasyndaǵy «T-Mobile Arena»-ny qalap otyr. Eki boksshy arasyndaǵy birinshi jekpe-jek sol jerde uıymdastyrylǵan bolatyn.
«Madison Square Garden» revanshty óz zalynda ótkizýge qatty qulshynyp otyr. Mıgel Kotto men Sadam Alı arasyndaǵy jekpe-jekti uıymdastyrǵanda men atalǵan keshenniń ıesimen kezdesken edim. Ol barlyq jaǵdaıdy jasap berýge ázir. Men merekelerden keıin talqylaıyq dedim. Alaıda Las-Vegastyń basty artyqshylyǵy, ol jerde otelder kóp, oıyn-saýyq ındýstrııasy da jaqsy damyǵan. Sosyn salyq tóleýdiń qajeti joq. Ol jaǵynan Nıý-Iorkte bári qymbat. Otelderde ishki teledıdar da bar (ondaıda jekpe-jekke adam az jınalady, sebebi kóbisi teledıdardan kóredi - avt.). Sondyqtan Las-Vegastyń orny bólek. Bul - bıznes. Men bolsam, óz boksshyma jaqsy jaǵdaı jasap, dollardy kóbirek jınap beretin sharany uıymdastyryp berýim kerek», - dedi Oskar De La Hoııa Forbes-ke bergen suhbatynda.
Aıta keteıik, Las-Vegasta ótken alǵashqy jekpe-jekte Golovkın men Alvares teń túsken bolatyn. Alaıda tanymal sportshylar men kásibı sarapshylar tóreshiler sheshimimen kelisken joq. Bir tóreshi jeńisti Alvareske (118-110) berse, ekinshisi Golovkın (113-115) jeńdi dep sheshti. Al úshinshisi 114-114 esebin tirkedi. Ásirese, 118-110 esebin shyǵarǵan Adelaıda Berdqa qarsy halyqtyń narazylyǵy qatty boldy. Don Trellanyń 114-114 esebi de qısynsyz bolyp shyqty.
Boks salasynyń sholýshysy, tanymal reseılik sarapshy Aleksandr Belenkııdiń oıynsha, Golovkın - Alvares jekpe-jeginde jeńisti meksıkalyq boksshyǵa berip qoıǵan bir tóreshiniń ádiletsiz sheshimi - tamasha oılastyrylǵan jospar. Onymen Alverestiń komandasy halyqtyń kóńilin basqa jaqqa buryp jiberdi .
