Golovkın - Alvares aıqasynyń sharttary ataldy

ASTANA. QazAqparat - ESPN tilshisi Den Rafael Gennadıı Golovkın (37-0, 33 KO) men Saýl Alvares (49-1-1, 34 KO) jekpe-jeginiń parametrlerin aıtyp berdi.

«Rıngtiń ólshemi - standartty: 20×20 fýt (6,1 sharshy metr). Jeńilis tapqan jaǵdaıda «Kaneloda» qarymta kezdesýge múmkindik bolady, Golovkınde - joq. Salmaq - 160 fýnt. Sondaı-aq boksshylar VADA-nyń dopıng-testisinen ótedi», - dedi Rafael.

Aıta keteıik, WBA Super, WBC, IBF jáne IBO nusqasy boıynsha tórt birdeı belbeýdiń ıegeri, qazaqstandyq boksshy Gennadıı Golovkın jáne meksıkalyq Saýl «Kanelo» Alvarestiń arasyndaǵy jekpe-jek aǵymdaǵy jyly 16 qyrkúıekte ótedi . Buǵan deıin Golovkınniń maýsym aıynda ulybrıtanııalyq Bıllı Djo Sonderspen aıqasýy kútilgen edi. Alaıda qazaqstandyq boksshynyń komandasy atalǵan jekpe-jekten bas tartty. 

Golovkın - Alvares jekpe-jegine jankúıerlerdiń rekordtyq sany jınalady degen boljam bar . Osy jekpe-jektiń jeńimpazy WBO tujyrymy boıynsha orta salmaqtaǵy álem chempıony Bıllı Djo Sonderspen (24-0, 12 KO) kezdesýi ábden múmkin. Ol jaıynda ulybrıtanııalyq boksshynyń promoýteri Frenk Ýorren de aıtyp otyr . 

Boxingnews24.com saıtynyń jýrnalısi Den Embroýztyń oıynsha, Golovkınge «sarybas» meksıkalyq juldyzdy nokaýtpen jeńý kerek. Eger bul aıqas ta nokaýtpen aıaqtalsa, GGG kásibı bokstyń ǵana emes, PPV reıtıngi shyńyna da shyǵa alady . 

Búginde álemdegi eń iri arenalar Golovkın-Alvares jekpe-jegin óz alańdarynda ótkizýge nıet tanytyp otyr. Olar Las-Vegastaǵy T-Mobile Arena, Dallastaǵy AT&T Stadium jáne Nıý-Iorktegi «Medıson Skver Garden» arenasy, keıin bul tizimge «Ýemblı» (London), «Steıpls-tsentr» (Los-Andjeles) jáne «Atsteka» (Mehıko) stadıondary qosyldy.