Gollıvýdtyń bir fılmin dýblıajdaý qansha turady

NUR-SULTAN. QazAqparat - Tańdaýly sheteldik fılmderdi qazaqsha sóıletýmen aınalysatyn «Bolashaq» korporatıvtik qory qamqorshylyq keńesiniń tóraıymy Dınara Shaıjúnisova bir týyndyny dýblıajdaýǵa qansha qarajat ketetinin aıtyp berdi, dep habarlaıdy QazAqparat tilshisi.

Bul týraly ol ortalyq kommýnıkatsııalar qyzmetinde ótken «Oıynshyqtar hıkaıasy-4» fılminiń tusaýkeserine arnalǵan baspasóz konferentsııasynda aıtty.

«Orta eseppen bir fılmdi dýblıajdaýǵa 100-150 myń AQSh dollary ketedi. Dýblıaj degen akterlerdi iriktep alyp, dybys jaza salýmen shektelmeıdi. Birneshe kezeńnen turatyn keshendi sharýa atqaramyz. Aqshany biz dýblıajǵa ǵana jumsamaımyz. Aýdarylǵan fılmdi kópshilikke jetkizý úshin jarnamalap, kınoteatrlarǵa shyǵamyz. Eń birinshi Disney kompanııasynyń ǵalamdyq ofısinen kelisim alý kerek. Odan keıin shyǵarmashylyq jáne tehnıkalyq komanda jasaqtaımyz. Bir ǵana fılmge 60-70 adam tartylady. Kastıngten ótken negizgi daýystardy taǵy da Disney maquldaýy kerek. Anjelına Djolı, Ýıll Smıt sııaqty álemdik akterler óz daýysyn dýblıajdaıtyn adamdy ózderi tańdaıdy. Eń qyzyǵy, sol tańdap alǵan daýys qana 8 jyl boıy atalmysh akterdi dýblıajdaı alady», - deıdi Dınara Shaıjúnisova.

Joba jetekshisi dýblıaj shyǵyndarynyń negizgi bóligi qandaı jumystarǵa ketetinin de aıtty.

«Kastıng ótkizilip, negizgi dýblıajdaýshylar bekitilgennen keıin qosymsha rólderge kóshemiz. Búkil mátindi aǵylshyn tilinen qazaqshaǵa tikeleı aýdaratynymyzdy aıta ketý kerek. Ol aýdarmany balanyń tanymyna beıimdeý degen taǵy bir jumys bar. Onsyz dýblıaj tartymsyz bolady. Barlyq dybys joldary jazylyp bolǵannan keıin taǵy da Disney-diń maquldaýyna jiberemiz. Fılmniń aqtyq synaǵy Londonda ótedi. Osy sebepten de dýblıaj jobalary qymbatqa túsedi. Bul - Disney kompanııasynyń barlyq elderge qoıǵan ortaq talaby. Úndistan bolsa da, Japonııa bolsa da osylaı. Aqtyq kórsetilim Londondaǵy stýdııada ótý kerek. Odan keıingi shyǵynnyń eleýli bóligi fılmdi alǵa jyljytýǵa ketedi. Al ýaqyt jaǵynan keler bolsaq, fılm mátinin aýdaryp, dýblıajdaýǵa 1-2 aı ketýi múmkin. Al tolyq protsess jarty jyldan 8 aıǵa deıin sozylady», - deıdi Dınara Shaıjúnisova.

Eske salsaq, ortalyq kommýnıkatsııalar qyzmetinde ótken baspasóz konferentsııasynda ánshi Danııar Ótegen 100-den astam otandyq akter Disney kompanııasynyń daýys bazasyna engenin aıtqan.