Gollıvýdta joǵalyp ketken malaızııalyq «Boıng» týraly fılm túsirý josparlanýda
ASTANA. QazAqparat - Malaysian Airlines kompanııasynyń jumbaq jaǵdaıda joǵalyp ketken «Boıng» ushaǵy Gollıvýdtyń kezekti blokbasterine negiz bolýy múmkin. Bul týraly rosbalt.ru jazdy.
AQSh aqparat quraldarynyń habarlaýynsha, Gollıvýdta qazir 50-den astam túrli jobalar boıynsha jumys júrgizilýde. Degenmen «370-Reıs» atpen túsirilýi múmkin jobaǵa áli eshbir kınokompanııa qulshynys bildirmese de, bul oı bolashaqta shyndyqqa aınalýy ábden múmkin. Sebebi Gollıvýd osy ispettes álemdik apattarǵa mindetti túrde óz únin qosyp otyrýdy ádetke aınaldyrǵan.
Alaıda mundaı fılm jýyq arada shyǵa qoıady dep aıtýǵa negiz joq. Ómirde oryn alǵan tragedııa men soǵan arnap túsirilgen fılmniń arasynda ádette uzaq ýaqyt bolady. Máselen, Nıý-Iorktegi terakt 2001 jyly bolsa, onyń Olıver Stoýn túsirgen kınosy tek 5 jyldan soń jaryq kórdi. Búginde Gollıvýdta Boston marafonynda bolǵan terakt týraly fılm túsirilip jatyr, alaıda onyń qashan shyǵatyny týraly áli belgisiz.
Malaızııalyq ushaq týraly fılm túsirse, kınorejısserler birneshe qıyndyqqa tap kelýi múmkin. Birinshiden, bul adamdardyń qazirgi emotsııalyq jaı-kúıi. Dál osyndaı jaǵdaıǵa baılanysty kezinde Sıdneı men Beıjiń arasynda joǵalyp ketken ushaq týraly avstralııalyq «Tereń sý» fılmi jaryqqa shyqpaı qalǵan bolatyn.
Ekinshi mańyzdy másele, oqıǵaǵa baılanysty aqparattardyń tym tapshy bolýy. Bul stsenarııshilerge qosymsha qıyndyq týǵyzady.
Aıta keteıik, búginde laınerdiń qaldyqtary bolýy múmkin degen kúdikpen Úndi muhıtynyń 3 jerinen ushaq synyqtary tabyldy.
