Gollıvýd juldyzy Ýıll Smıt qazaqsha sóılep ketti
ASTANA. 22 mamyr. QazAqparat - «Qara kıimdiler-3» fılminiń keıipkerleri qazaqsha sóıleı bastady.
WALT DISNEY stýdııasy, «Bolashaq» qaýymdastyǵy jáne «Marvin» kompanııasy atalmysh fılmniń memlekettik tildegi dýblıajyn jasap shyqty.
Bul týraly búgin Astanada ótken baspasóz máslıhatynda «Bolashaq» qaýymdastyǵy keńesiniń tóraǵasy Baýyrjan Baıbek málim etti.
«Qara kıimdiler-3» fılmi álem boıynsha tek 7 tilge aýdarylǵan, sonyń ishinde qaza tili de bar.
Sonymen «Qara kıimdiler-3» fılmi kınoteatr ekrandarynda memlekettik tilde shyǵatyn ekinshi Gollıvýd jobasy bolmaq. Bunyń aldynda «Kólikter- 2» mýltfılmi qazaq tiline tárjimalanǵan bolatyn.
B. Baıbektiń aıtýynsha, ol kezde mýltfılmdi tamashalaýǵa 25 myńǵa tarta kórermen kelgen. Bul - eldegi turaqty kórermenderdiń 30 paıyzy. Sondyqtan memlekettik tildegi aýdıtorııanyń da tym az emes ekendigin de baıqaýǵa bolady.
«Qara kıimdiler-3» fılminiń negizgi keıipkerlerin dybystaıtyn ártisterdiń tizimin bekitý úshin Qazaqstanǵa «Sony Pictures» kompanııasynyń dýblıajdaý mamandary keldi. Dybystaý jumystary Almaty qalasyndaǵy «Cinema Tone Production» stýdııasynda jasaldy.
Dýblıaj rejısseri Áıgerim Ońalbektiń aıtýynsha, Ýıll Smıttiń jyldam sóıleý mánerine shamasy keletin ártisti tabýǵa qıynǵa soqqan kórinedi. Kóptegen synaqtardan keıin «Sony Pictures» kompanııasynyń ókilderi fılmniń bas keıipkerin dybystaý úshin Azamat Qanapııaevti tańdady. Azamat «Kólikter-2» mýltfılminiń keıipkeri Metrdi de dybystaǵan bolatyn. Ýolt Dısneı kompanııasynyń mamandary onyń daýysyna joǵary baǵa berdi.
«Qara kıimdiler-3» blogbasteri qazaqstandyq prokatqa 2012 jyldyń 24 mamyrynda orys jáne qazaq tilderinde shyǵady. Týyndynyń alǵashqy tanystyrylymy búgin «Kerýen» saýda ortalyǵynda saǵat 18.00-de ótedi.
