Gollıvýd juldyzdary Astanada «Talant» halyqaralyq óner ortalyǵyn ashty
ASTANA. 24 naýryz. QazAqparat /Jasulan Amanbaıuly/ - Astanada QR Eńbek sińirgen ártisi, ánshi-sazger Marat Omarovtyń «Talant» halyqaralyq óner ortalyǵy ashyldy. Ortalyqtyń tusaýyn Gollıvýd juldyzdary Mark Dakaskos pen Kerı-Hıroıýkı Tagava kesti.
M. Omarovtyń aıtýynsha, atalmysh ortalyq Búkilálemdik «FIDOF» kompozıtorlar qaýymdastyǵymen áriptestik ornatqan. Osy kelisimniń negizinde Qazaqstan-AQSh birlesken fılmderi túsirilmek. Úzdik jobalar shet memleketterdegi festıvalder men baıqaýlarǵa qatystyrylady. Sonymen qatar árbir toqsan saıyn jas daryn ıeleri AQSh óńirlerine shyǵarmashylyq týrlar jasaıdy.
«Halyqaralyq óner ortalyǵynda 20 atalym boıynsha sabaq ótkiziledi. Vokal, ınstrýmentaldy, akterlik sheberlikteri, dombyra, horeografııa, fortepıano, gıtara, balet bıi syndy kóptegen baǵyttar boıynsha ónerpazdar daıyndalady. Árbir daryndymyn degen azamat osynda óz qabiletterin damytyp, sheberlikterin shyńdaı alady»,-dedi M. Omarov.
Osy sharaǵa arnaıy at basyn burǵan Kerı-Hıroıýkı Tagava Qazaqstan halqyna jańa tabystar tiledi. «Men osy eldiń bolashaǵyna, tamasha jastaryna senemin. Qazaq eli Ortalyq Azııada kóshbasshy memleket ekeni daýsyz»,-dep atap kórsetti ol.
