Gollıvýd juldyzdary Paramount pen Warner Bros-tyń birigýine qarsy shyqty
ASTANA. KAZINFORM — Myńnan astam akter, rejısser jáne stsenarıst Paramount Skydance jáne Warner Bros. Discovery kompanııalarynyń birigýine narazylyq bildirip, kınoındýstrııadaǵy básekelestik pen jumysqa ornalasý qaýpin alǵa tartyp, ashyq hatqa qol qoıdy, dep habarlaıdy NBC.
Gollıvýd ókilderi Paramount Skydance kompanııasynyń Warner Bros. Discovery-di satyp alý mámilesine jappaı qarsy shyqty. Block the Merger platformasynda 13 sáýirde jarııalanǵan ashyq hatqa myńnan astam ındýstrııa ókili qol qoıǵan, olardyń qatarynda tanymal akterler, rejısserler jáne stsenarıster bar.
Qol qoıǵandardyń ishinde Braıan Krenston, Djeın Fonda, Hoakın Fenıks, sondaı-aq Ben Stıller, Glenn Kloýz, rejısser Iorgos Lantımos jáne «Oskar» ıegeri Denı Vılnev bar.
Úndeýge qatysýshylar bul mámile medıanaryqtyń odan ári shoǵyrlanýyna, básekelestiktiń azaıýyna jáne shyǵarmashylyq mamandarǵa jaǵdaıdyń nasharlaýyna ákeledi dep málimdeıdi.
Olardyń pikirinshe, bul jumys oryndarynyń qysqarýyna, fılm óndirý múmkindikteriniń shektelýine jáne kórermender úshin kontent baǵasynyń ósýine ákelýi múmkin. Sondaı-aq AQSh-taǵy iri kınostýdııalar sany azaıyp, saladaǵy monopolııalaný kúsheıedi dep eskertedi.
— Medıaındýstrııanyń shoǵyrlanýy orta bıýdjettegi fılmderdiń joıylýyn, táýelsiz prokattyń álsireýin, halyqaralyq satý naryǵynyń quldyraýyn, kiristiń edáýir bóliginiń joıylýyn jáne kıno tıtrleriniń tutastyǵynyń buzylýyn jedeldetti. Bul faktorlardyń jıyntyǵy búkil shyǵarmashylyq qaýymdastyqtyń turaqtylyǵyna qaýip tóndiredi, — delingen hatta.
Jaýap retinde Paramount Skydance kınosalanyń alańdaýshylyǵyn eskeretinin jáne jylyna keminde 30 tolyqmetrajdy fılm shyǵarýdy, sondaı-aq táýelsiz shyǵarmashylyq basqarýdy saqtap, kınoındýstrııany damytýǵa nıetti ekenin málimdedi.
Eske sala keteıik, aqpan aıynyń sońynda Paramount Skydance Warner Bros. Discovery-di satyp alý jóninde kelisimge kelgenin jarııalaǵan bolatyn. Kompanııa basshysy Devıd Ellıson bul mámileniń maqsaty — eki stýdııa murasyn biriktirip, jańa býyn medıa kompanııasyn qurý ekenin aıtqan.
Buǵan deıin Netflix pen Warner Bros-tiń birigýi kınoteatrlarǵa qıyn soǵýy múmkin ekeni aıtylǵan edi.
