Gollıvýd juldyzdary «Altyn globýsta» ICE saıasatyna qarsylyq tanytty

ASTANA. KAZINFORM — «Altyn globýs» syılyǵyn tabystaý rásiminde tanymal tulǵalar Mınneapolıste óz kóliginde atyp óltirilgen Rene Gýdty eske alý úshin AQSh ımmıgratsııa jáne keden qyzmeti (ICE) qyzmetine qarsylyq retinde belgisheler taǵyp júrdi, dep habarlaıdy AP.

Aq-qara tústi belgishelerde «Be Good» jáne «ICE OUT» urandary jazylǵan, bul rásimge ótken jylǵy saıasattan tys atmosferamen salystyrǵanda saıası basymdyq berdi. Qyzyl kilemde belgishelerdiń birin taǵyp júrgender arasynda akter Mark Rýffalo bolǵan.

Mınneapolıstegi oqıǵadan keıin búkil el boıynsha Rene Gýdtyń ólimi úshin jaýapkershilikke tartýdy talap etetin narazylyq aktsııalary  bastaldy. Budan basqa, Portlendte bólek atys boldy, onda shekara patrýliniń qyzmetkerleri eki adamdy jaraqattady. Keıbir narazylyq aktsııalarynda polıtsııamen qaqtyǵystar boldy.

— Qoǵamdaǵy ár adam óz oıyn ashyq aıtýy kerek. Ásirese halyqtyń kóńil-kúıin kórsetetin ártister men óner adamdarynyń daýysy mańyzdy, — dep málimdedi ICE-qa qarsy belgisheler taratý naýqanyn uıymdastyrýshylardyń biri, Working Families Power uıymynyń ókili Nelını Stamp.

«ICE OUT» belgisheleri ıdeıasy Stamp pen Maremoto latynamerıkalyq quqyq qorǵaý uıymynyń atqarýshy dırektory Djess Morales Roketto arasyndaǵy túngi hat jazysýynan keıin paıda boldy. Uıymdastyrýshylardyń pikirinshe, iri mádenı is-sharalar mıllıondaǵan kórermenniń nazaryn áleýmettik máselelerge aýdarýǵa kómektesedi.

Belgisheler saltanat aldyndaǵy saýyq keshterinde, sondaı-aq qyzyl kilemdegi qatysýshylarǵa taratylyp, bul naýqanǵa tanymal tulǵalar men belsendilerdi tartýǵa múmkindik berdi.

Eske sala ketsek, Altyn globýs» syılyǵyn tabystaýdyń 83-shi saltanatty rásimi Los-Andjelestegi Beverly Hilton qonaqúıinde ótip jatyr. Saltanatty rásimniń tikeleı kórsetilimi CBS telearnasynda jáne Paramount+ strımıngtik servısinde kórsetiledi.