Gollıvýd Mańǵystaý týraly fılm túsirmek

AQTAÝ. QazAqparat - Álemniń iri kınostýdııa ókilderi Mańǵystaý týraly fılm túsirýdi josparlap otyr. Bul týraly óńirlik kommýnıkatsııalar qyzmeti alańynda sheteldik prodıýserlerdiń qatysýymen ótken brıfıngte aıtyldy, dep habarlaıdy QazAqparat tilshisi.

Nur-Sultan qalasynda ótken 15-Halyqaralyq «Evrazııa» kınofestıvaliniń ashylýyna kelgen sheteldikter elordany jáne Almaty oblysyn aralap, Mańǵystaýǵa kelgen. Olardyń arasynda AQSh, Jańa Zelandııa, Slovenııadan Discovery, NBC Universal, Global Film Solutions, Lionsgate, Warner Horison syndy iri gollıvýdtyq kınokompanııalardyń ókilderi bar.

Eki kúnge kelgen sapar aıasynda olar Sherqala taýyn, jerasty meshitterin aralap, shar tárizdes alyp tastardyń tarıhymen tanysqan. Sondaı-aq, jartastaǵy soqpaq joldarmen júrip ótip, jelkendi qaıyqpen serýendedi.

«Nur-Sultannan bastaý alǵan saparymyz qyzyqty sátterge toly boldy. Kóp tájirıbe jınadyq. Erekshe shabyt aldym, tabıǵat qandaı erekshe. Barlyq júrip ótken jerlerimizdi beınetaspaǵa túsirip kelemiz. Vıdeo - rolık jasap, óz elimizge barǵanda kórsetkimiz keledi. Bolashaqta qaıtadan kelip, kıno túsirýdi josparlap otyrmyz. Biraq, ázirge qandaı baǵytta ekenin oılastyrýdamyz», - dedi Discovery arnasynyń vıtse-prezıdenti Djordjına Sýrtıs.

Jetisý óńiri men mańǵaz Mańǵystaýdyń tamasha tabıǵaty sheteldik kınokompanııa óqilderin erekshe tańǵaldyrǵan.