«Gollıvýd qazaqshaǵa bet burdy ma?» - respýblıkalyq basylymdarǵa sholý
***
«Keshe Parlament Senatynyń Tóraǵasy Qasym-Jomart Toqaev Qazaqstan Respýblıkasyndaǵy kezekten tys prezıdenttik saılaýdy baıqaý jónindegi EQYU-nyń qysqa merzimdi baıqaýshylary mıssııasynyń arnaıy úılestirýshisi, EQYU Paramenttik Assambleıasy baıqaýshylar delegatsııasynyń basshysy Tonıno Pıtsýlany qabyldady», - dep jazady «Egemen Qazaqstan» gazeti. Basylymnyń atap ótýinshe, EQYU PA baıqaýshylar delegatsııasyn qabyldaı otyryp, Tóraǵa halyqaralyq qoǵamdastyq tarapynan prezıdenttik saılaýǵa erekshe yqylas baıqalyp otyrǵanyn atap ótti. Saılaý monıtorıngine tek EQYU PA tarapynan 80-nen astam baıqaýshylar qatysady.
«Egemen Qazaqstan» gazetiniń jazýynsha, keshe Aqordada Prezıdenttiń kómekshisi - Qaýipsizdik Keńesiniń hatshysy Marat Tájın Qytaı Halyq Respýblıkasynyń Qazaqstandaǵy Tótenshe jáne ókiletti elshisi Chjoý Lımen kezdesý ótkizdi. Taraptar saıası, saýda-ekonomıkalyq, gýmanıtarlyq salalarda, sondaı-aq óńirlik qaýipsizdikti qamtamasyz etý máseleleri boıynsha belsendi únqatysý úderisterin ustaný nıetterinde ekenin bildirdi. «Kelissóz barysynda sáýir aıynda Astana qalasynda Shanhaı yntymaqtastyq uıymyna múshe memleketter qaýipsizdik keńesteri hatshylarynyń otyrysyn ótkizýge baılanysty máseleler talqylandy», - dep jazady basylym.
***
«Qazaq mektepterindegi bilim sapasy qaıtkende jaqsarady? Munyń kiltıpany, eń aldymen, oqýlyqtarda bolsa kerek. Sondyqtan «qazaq tilindegi mektep oqýlyqtary bala túısigine qanshalyqty qonymdy» degen saýalǵa jaýap izdep, bilim negizi bastaýyshta bolǵan soń, sol kitaptar boıynsha shaǵyn zertteý jasap kórdim. Sonda baıqaǵanym, bizdiń oqýlyqtardaǵy jańa taqyrypty túsindirý utymdy jolǵa qoıylmaǵan eken», - dep jazady «Aıqyn» gazetiniń tilshisi. Jazylǵan jaıt jaıynda jan-jaqty aqparat alǵyńyz kelse, basylymdaǵy «Qazaqsha oqýlyq qateden qashan arylady?» degen maqalaǵa kóz júgirtińiz.
«Aıqyn» gazetiniń jazýynsha, «Úmit» búırek aýystyrý jónindegi múgedekter qoǵamy» respýblıkalyq qoǵamdyq birlestiginiń tóraǵasy Murat Óskenbaev Pákstanda búırek aýystyrýǵa nıetti naýqastarǵa bul qadamnyń qaýiptiligin aıtyp, dabyl qaǵyp otyr. Onyń aıtýynsha, 2009-2010 jyldary bul elde ota jasatqan qazaqstandyq 14 naýqas elge kelisimen kóp uzamaı kóz jumǵan. Al sońǵy eki aıda sátsiz jasalǵan otadan 4 otandasymyz bul dúnıemen qosh aıtysty. Maqala «Pákistan búıregi ómirińizge qaýipti» degen taqyryppen berilgen.
***
«Endigári Qarýly Kúshterdiń qarý-jaraq qoımalary, áskerılerdiń arsenaldary saqtalǵan bazalar janynan tyıym salynatyn aýmaqtar belgilenedi. Keshe Parlamenttiń joǵary palatasy osyndaı shekteýdi qamtıtyn zańdy eki oqylymda qabyldady», - dep jazady «Alash aınasy» gazeti juma kúngi nómirindegi "Baıqońyr nege baqylaýsyz?» degen maqalasynda. Basylymnyń atap ótýinshe, qujattyń qabyldanýyna buǵan deıin áskerı qoımalarda oryn alǵan qaıǵyly oqıǵalar sebep bolsa kerek. Adam ómirin jalmaǵan sondaı jarylystardyń saldaryn taldaǵan mamandar azamattardyń qoıma mańynan aýlaq júrýin, onyń janyna tam soǵýǵa tıym salýdy zań arqyly júrgizgendi quptasa kerek.
Balalary kúnuzaq úıindegi «kók jáshikke» telmiretin qala jurty gollıvýdtyq «Tachkı» degen mýltfılmdi jaqsy biletin bolar. Nebir túrli temir tulparlardyń ómiri men jarys joldary týraly qyzyqty hıkaıattarǵa toly bolǵandyqtan ba, mektepke deıingi balalardyń qyzyǵýshylyǵy eren. Sol fılmdegi «Makýın» esimdi júırik mashınanyń sýretteri tońazytqyshy men balalar bólmesine ilinbegen úıler kemde-kem shyǵar. Mine, osy mýltfılmniń «Tachkı-2» nusqasy qazaqsha dybystalyp, aldaǵy maýsym-shilde aılarynda otandyq kınoprokatqa túspek. Bul jaıynda «Alash aınasy» gazetindegi «Gollıvýd qazaqshaǵa bet burdy ma?» degen maqaladan baıandalǵan. «Sátin salyp, ýaqytynda shyqsa, túrktildes elderdiń ishinde «Tachkı» mýltfılmi aýdarylǵan ekinshi til qazaq tili bolmaq. Buǵan deıin bul fılm túrik tiline aýdarylǵan eken. Qııańqy qylyqtary da, keskilesken shaıqastary da bar, sýreti suryqsyz, sıýjeti túsiniksiz bolyp keletin, sóıte tura balalarymyzdy teledıdarǵa matap qoıatyn nebir túrli mýltfılmderge qaraǵanda, myna fılm áldeqaıda jaqsy ekenine daý joq. Endi tek aýdarmasy anyq, dybystalýy sátti shyqsa eken. «Ájeptáýir án edi, pushyq shirkin qor qyldy» degenniń kebin kımese dep tileımiz», - dep jazady basylym.
***
«Memlekettik hatshy - Syrtqy ister mınıstri Qanat Saýdabaev EQYU Parlamenttik Assambleıasynyń Bas hatshysy Spenser Olıvermen kezdesti», - dep jazady «Kazahstanskaıa pravda» gazeti. S.Olıver Qazaqstandy EQYU-daǵy jemisti tóraǵalyǵymen jáne Astana Deklaratsııasynyń qabyldanýymen quttyqtady. Áńgimelesýshi taraptar aldaǵy prezıdenttik saılaýdyń ashyq ári ádil ótkenin qoldaıtyndyqtaryn málimdedi. Óz kezeginde Q. Saýdabaev Qazaqstannyń 2010 jylǵy EQYU-daǵy tóraǵalyǵy kezeńinde Qazaqstan bastamalaryna barynsha qoldaý kórsetkeni úshin jáne saılaýǵa belsendi qatysyp otyrǵany úshin EQYU Parlamenttik Assambleıasyna alǵysyn bildirip, jemisti ári tolyqqandy jumys jasaýǵa barlyq jaǵdaı jasalatynyna sendirdi.
