Gollıvýd fılmderinen bas tartýǵa bolady - qyrǵyz rejısseri
ASTANA. QazAqparat - Astanada ótip jatqan XIII Halyqaralyq "Eýrazııa" kınofestıvali aıasynda Qyrǵyzstannyń kınematografıster odaǵynyń tóraǵasy, rejısser Sadyq Sher-Nııaz óz elinde Gollıvýd fılmderinen bas tartý bastamasy qandaı nátıje bergenin aıtyp berdi. Búgin Qazaqstan, Grýzııa, Qyrǵyzstan men Ózbekstannyń kınematografısteri bas qosyp, AQSh-tyń fılmderine qaraı bermeı, kınoprokatty ózdigimen damytý máselelerin talqylady, dep xabarlaıdy QazAqparat tilshisi.
"Bir jyly biz Gollıvýd fılmderinen múldem bas tarttyq. Men "Manas" kınoteatrynda sheteldik kınony múldem kórsetpesin dep buıryq shyǵardym. Sonyń arqasynda otandyq fılmderge suranys artty, adamdardyń sany da kóp boldy. Qyrǵyzdyń jaqsy fılmderine uzaq ýaqyt boıy joǵary suranys boldy. Máselen, "Anany izdeý jolynda" fılmi Qazaqstanda da jaqsy kórsetildi", - deıdi Sadyq Sher-Nııaz. Rejısserdiń oıynsha, "Eýrazııa" kınofestıvali arqyly TMD elderiniń fılmderin keńinen kórsetip, jergilikti naryqty barynsha qorǵaýǵa bolady.
Jıynnyń moderatory Baýyrjan Shúkenov te burynǵy dástúrdiń de, baılanystardyń da úzilgenine basa nazar aýdaryp, kórshi elderdiń kıno salasyndaǵy yntymaqtastyǵyn damytý qajettigin jetkizdi. "Shyny kerek, qazirgi kezde biz AQSh, Reseı, Ýkraına jáne taǵy basqa elderdiń kıno jańalyqtaryn jaqsy bilemiz de, kórshi memleketterde ne bolyp jatqanyn bilmeımiz. Sol sebepti búgingi jıyndy ótkizgendi jón kórdik. Bálkim, bir memorandýmdy rásimdeımiz, ıa bolmasa, kınoalıasqa birigemiz. Bizge qaýymdastyqty da qurýǵa bolady. Sonyń arqasynda áriptestik baılanystardy damytýǵa múmkindik bar", - dep atap kórsetti B. Shúkenov.
