Gollıvýd ártisi S.Sıgal: Qazaq halqynyń óz mádenıeti men tabıǵatyna degen qurmeti meni únemi tańdandyrady
ANA. 2 shilde. QazAqparat /Gúlmıra Álıakparova/ - Qazaq halqynyń óz mádenıeti men tabıǵatyna degen qurmeti meni únemi tańdandyrady jáne tańdandyra berýde.
Bul týraly búgin Astana kúni merekesine oraı elordada ótip jatqan ekshn-fılmderdiń «Astana» halyqaralyq festıvaline kelgen Gollıvýd ártisi Stıven Sıgal aıtty.
«Men Qazaqstanda birneshe ret boldym. Qazaq halqynyń óz mádenıeti men tabıǵatyna degen qurmeti meni únemi tańdandyrady jáne tańdandyra berýde. Sol sebepti osynda bolý men úshin zor qýanysh. Bul festıvaldiń mańyzy joǵary jáne ol óte qyzyqty», - dedi ol jýrnalıstermen ótken baspasóz máslıhatynda.
Onyń pikirinshe, qazaq halqynyń asa baı mádenıeti men tarıhynyń osy ýaqytqa deıin saqtalyp kelýi - sol mahabbattyń arqasy.
Sondaı-aq ol, barlyq dinge jáne barlyq ultqa tolerantty qaraıtynyn aıtty. «Meni ıslam dini tánti etedi. Biraq ózim býddızm dinin ustanamyn», - dep túıindedi ol.
S.Sıgal festıval kúnderi Astananyń birqatar kórikti jerlerinde bolýdy josparlap otyr. Ol ásirese, «Báıterek» monýmenti men «Pekın Palas» saraıyn kórgisi keletinin aıtty.
Eske salaıyq, Astana kúni merekesin atap ótý aıasynda bıyl elordada ekshn-fılmderdiń «Astana» halyqaralyq festıvali ekinshi ret shymyldyǵyn ashty. Festıvaldiń ashylý saltanaty keshe Beıbitshilik jáne kelisim saraıynda ótti. Astanaǵa arnaıy at arytyp kelgen gollıvýd ártisteri Stıven Sıgal, Maıkl Mendsen jáne Armand Assante, reseılik juldyzdar Dmıtrıı Nagıev, Nıkolaı Valýev, Marat Basharov, Egor Konchalovskıı, Sergeı Svetlakov, Gosha Kýtsenko, Ekaterına Strıjenova jáne Vıktor Verjbıtskıı sonymen birge, Qazaqstannyń kıno ártisteri Dosqan Joljaqsynov, Asanáli Áshimov, Venera Nyǵmatýlına, Erik Joljaqsynov, Farhat Ábdraıymov, Ásel Saǵatova, Ámir Qaraqulov, Ahan Sataev, Igor Vovnıanko jáne Ardaq Ámirqulov aldymen, dástúrli túrde, jankúıerleriniń aldynda qyzyl kilemniń ústimen júrip ótti. 5 shildege deıin ótetin festıval barysynda Astana kınoteatrlarynda 21 fılm kórsetiletin bolady. Sondaı-aq, kıno óneriniń maıtalmandarynan quralǵan qazylar alqasy festıvalǵa usynylǵan jas rejısserlerdiń jobalaryn qarap, jeńimpazdy anyqtaıtyn bolady. Festıval Astana ákimdiginiń qoldaýymen ótkizilýde. Onyń prezıdenti - álemdik rejısser Tımýr Bekmambetov.
