Gollıvýd aktrısasy Lındseı Lohan jol apatyna ushyrady
ASTANA. 10 maýsym. QazAqparat - Tanymal gollıvýd aktrısasy Lındseı Lohan «Porshe» kóligimen júk mashınasyna soqtyǵysyp, aýrýhanaǵa jetkizildi, dep habarlady Ýtro.rý.
Oqıǵa juma kúni kúndiz Kalıfornııa shtatynyń Santa-Monıka qalasynyń jaǵajaıyna taqaý tas jolda oryn aldy.
«Lohan soltústikke qaraı jyljyp kele jatqanda onyń kóligi júk mashınasymen soqtyǵysty», - deıdi polıtsııa serjanty Rıchard Lıýıs.
Onyń atap ótýinshe, júk kóliginiń jolaýshylary zardap shekpegen. Al aktrısamen birge onyń kómekshisi bolǵan.
«Apattan keıin Lohan denesiniń aýyryp turǵandyǵyn aıtqan. Jolaýshysy da azdap zardap shekken. Ekeýi de aýrýhanaǵa jetkizildi», - dedi polıtsııa serjanty.
Esterińizge sala keteıik, 25 jastaǵy Lındseı Lohan túrli oqıǵalarǵa basy shatylýymen erekshelenedi. Birneshe márte alkogol men esirtkige táýeldilikten arylý úshin ońaltý ortalyqtarynda em alǵan. 2007 jyly kólikti masań kúıde 2 ret basqarǵany úshin 3 jylǵa shartty túrde sottalyp, keıin bul merzimi taǵy bir jylǵa uzartylǵan. 2011 jyldyń aqpanynda zergerlik buıymdardy urlaǵany úshin qoǵamdyq jumystarǵa jegilgen. Tergeý málimetterine sáıkes, ol Los-Andjelestegi Kamofie zergerlik dúkenine jartylaı baǵaly tasty altyn alqany qaıtarmaǵan. Tanymal aktrısanyń osyndaı jaısyz oqıǵalarǵa basy shatylǵandyǵy týrasyndaǵy aqparattar jeterlik.
