Gollıvýd akterleriniń ereýilinen Emmy syılyǵyn tapsyrý kelesi jylǵa qaldy
LOS-ANDJELES. QazAqparat – Emmy televızııalyq syılyǵyn tapsyrý rásimi kelesi jylǵa qaldyryldy. QazAqparat bul týraly Associated Press-ke silteme jasap habarlaıdy.
Gollıvýdta ótip jatqan stsenarııshiler men akterlerdiń ereýiline baılanysty 18 qyrkúıekte ótýi tıis bolǵan Emmy syılyǵyn tapsyrý rásimi 2024 jyldyń 15 qańtaryna shegerildi.
Emmy syılyǵynyń 75-inshi ret tapsyrylý saltanaty Fox telekanalynda tikeleı efırden kórsetiletin bolady.
Buǵan deıin habarlaǵanymyzdaı, osy kúnderi Gollıvýdta kınoındýstrııa salasy mamandarynyń narazylyq aktsııalary ótip jatyr. Ol 14 shildede bastaldy. Amerıkanyń televıdenıe jáne kıno akterleriniń federatsııasy 160 myńǵa jýyq ártistiń múddesin alǵa tartyp otyr. Olar jalaqynyń kóterilýin jáne qosymsha jumystardyń tólenýin, sondaı-aq kıno óndirisinde jasandy ıntellektini qoldanýdy shekteýdi talap etýde.
