Gollandyqtar elimizde kartop ónimderi zaýytyn salmaq nıette
ASTANA. QazAqparat - Búgin QR Premer-Mınıstriniń orynbasary - aýyl sharýashylyǵy mınıstri Asqar Myrzahmetov «Farm Frıtes» gollandııalyq kompanııasynyń ókilderimen kezdesti, dep habarlaıdy primeminister.kz.
Qazirgi ýaqytta «Kóktem Agroservıs» JShS men «Farm Frıtes» kompanııasynyń arasynda tońazytylǵan kartop ónimderi zaýytynyń qurylysyn Qazaqstannyń soltústik-shyǵys óńirinde júrgizý boıynsha kelissózder júrgizilýde.
Kelissóz barysynda qýattylyǵy 140 myń tonna kartop óndiretin joba talqylanyp, joba boıynsha ınvestıtsııa quny qarastyrylýda.
«Farm Frıtes» kompanııasy qazirgi ýaqytta Pavlodar men Qaraǵandy oblystarynyń shıkizat bazasy boıynsha Odaq múshelerimen tehnıkalyq jabdyqtalý, qoıma qýattylyǵy jáne tabıǵı-klımattyq jaǵdaılary boıynsha kartopty baptaý jóninde zertteý jumystaryn júrgizýde.
«Farm Frıtes» kompanııasy 1971 jyly Nıderlandyda otbasylyq kásiporyn retinde qurylǵan. Kompanııa salqyndatylǵan jáne tońazytylǵan kartop ónimderin óndirýmen aınalysady. Kompanııa álemniń 40 elinde 1 500 qyzmetkerden turatyn 6 zaýyty men 40 satý keńsesi jumys jasap tur. Kartoptyń ónimdiligi jylyna 1,3 mln tonnany qurap, álemniń 80-nen asa eline eksporttalýda.
