Gollandııalyqtar Qazaqstanǵa qyzǵaldaq ósirýdiń qyr-syryn úıretpek

Aldymen  qonaqtar Almaty oblysy ákiminiń orynbasary Serikjan Beskempirovpen kezdesti. Taraptar keleshektegi iskerlik yntymaqtastyq aıasyn talqylady.

Keıin "Kóktem grand" qonaqúı kesheninde gollandııalyq ozyq tehnologııalarǵa arnalǵan semınar-keńes ótti. Jıynda jylyjaı keshenderiniń qurylysyn júrgizý, jylyjaılarǵa arnalǵan avtomattandyrylǵan júıeler ornatý, jemis-jıdek jáne kókónis qoımasyn salý, jylyjaı keshenderine jaryqtandyrý júıesin júrgizý jaıly aıtyldy. 

Semınar-keńeske aýylsharýashylyǵy maqsatyndaǵy ónimder óndiretin gollandııalyq 14 kompanııanyń ókilderi qatysty. Olar jergilikti kompanııalarmen kelissózder júrgizip, qos tarapqa da tıimdi talaptar men usynystar jaıyn talqylady.

«Nıderlandy aýylsharýashylyq ónimderin eksporttaý jaǵynan álemde 2-shi orynda tur. Shyndap kelgende, bizdiń jer aýmaǵymyz sizderdikinen 65 ese kishi. Biraq, bizdiń jetistikterimiz kelisersizder, kósh ilgeri. Máselen, jylyjaılar júıesine bizde 10 myń gektar jer berilgen. 5 myń gektaryna - kókónis, 5 myńyna - gúl ósirip otyrmyz. Mundaı jetistikter árıne, ozyq tehnologııalardyń arqasy. Biz osynda kelmes buryn Aýyl sharýashylyǵy mınıstrliginde boldyq. Qazaqstanmen agrarlyq saladaǵy qarym-qatynasty arttyrǵymyz keledi», - deıdi Nıderlandy Koroldigi elshiliginiń aýylsharýashylyq máseleleri jónindegi keńesshisi  Meýves Braýer.

Koroldikten 30-ǵa jýyq adam keldi. Quramynda Nıderlandynyń ekonomıkalyq ister, aýylsharýashylyq mınıstrlikteri ókilderi, sondaı-aq agrarlyq saladaǵy 14 iri kompanııanyń jetekshileri bar. Jalpy, muhıt asyp kelgenderden úırenerimiz kóp, deıdi jıynǵa qatysýshylar. Máselen,  Qazaqstan shetelden jylyna 154 mln dollarǵa gúl satyp alady. Qarajattyń basym bóligi osy Nıderlandyǵa ketip jatyr. Tipti, qyzǵaldaqtyń Otany -Qazaqstan deı tura, qyr gúlin da solardan satyp alamyz. Gollandııalyqtar qyzǵaldaqty ósirýdiń qyr-syryna úıretýge de ázir. Aıta ketsek, aýmaǵy 1 gektar gollandııalyq daıyn jylyjaıdyń quny - 1-1,5 mln eýro.