Gollandııalyq saıahatshylar jetim balalar máselesine nazar aýdara otyryp, Jibek joly týraly derekti fılm túsirmek
ALMATY. Shildeniń 8-i. QazAqparat /Názıra Eleýhan/ - Búgin Almatyǵa jol-jónekeı Jibek jolyn zertteýshi gollandııalyq Mark van der Verff jáne Sander Parmente esimdi saıahatshylar keldi,
dep habarlaıdy QazAqparat.
Olar Rotterdamnan Shanhaıǵa deıin jáne júrgen joldarymen qaıtadan júrip ótýge bel býypty. «30 000 shaqyrym bolatyn bul joldy júrip ótýimiz úshin shamamen 6 aıdaı ýaqyt kerek. Bul kvadrotsıkl jaıdan-jaı tańdap alynǵan joq, óıtkeni bul jolda dalalar men qıyndyqpen ótetin bıik taýlar, tipti shóldi jerler de bar. Biraq, biz úshin baǵyndyrylmaıtyn bıik taýlar men asýlar joq», dedi gollandııalyq saıahatshy Mark van der Verff. Onyń aıtýynsha, saıahat barysynda eki saıahatshynyń basynan keshken oqıǵalary jaıly «Bul keremet ómir» atty derekti fılm túsiriletin bolady. «Fılmde eki kir-kir bolǵan saıahatshynyń qyzyqqa toly oqıǵalarymen qatar, Jibek Joly boıyndaǵy eń ásem de kórkem jerler, tabıǵattyń tylsym jany baıandalatyn bolady», dep atap ótti Mark van der Verff.
«Kóne Jibek joly mańyzdy saýda joly retinde qaıtadan jandanady dep sanaımyz, óıtkeni bul jolda mádenı qundylyqtar, bilim, din, tehnologııalar jáne ómirdiń jaqsy bolatynyna degen senim toǵysqan. Jarty álemge sozylǵan bul saıahatymyzda biz adamdardyń ómirin jaqsartýǵa septigin tıgizetin batyl da shyǵarmashylyq ıdeıalardy kórsetetin bolamyz», dedi Sander Parmente.
Saıahatshylar sapary barysynda jetim balalarǵa qurylyp jatqan januıalar SOS Children's aýyldaryna nazar aýdarmaq. «Biz birneshe aýylǵa baryp qana qoımaı, bul máselege nazar aýdartyp, olarǵa meılinshe kóbirek qaıyrymdylyq kómek jınaıtyn bolamyz», dedi Mark van der Verff. Sander Parmenteniń aıtýynsha, saıahat barysynda olar oryndaıtyn tapsyrmalarǵa daýys beriletin bolady. «Bizdiń saıtqa joldanatyn daýystar SOS balalar aýyly qoryna jarna retinde qabyldanady. Qandaı tapsyrmaǵa kóp daýys jınalsa, ıaǵnı kóp aqsha jınalsa, biz sony oryndaıtyn bolamyz. Ol jaıyndaǵy aqparattar bizdiń saıtta (http://silkoffroadsurvival.com/trip-2/the-trip?lang=en ) jarııalanatyn bolady», dedi ol.
Mark van der Verff 29 jasta, Nıderlandy polıtsııasynda qyzmet jasaıdy. Ol sonymen qatar, sý asty júzý ınstrýktory. Ol Sırııa, Lıvan, Iran elderinde jalǵyz saıahat jasaǵan.
Sander Parmente 42 jasta, Gaagada táýelsiz sýretshi. Ol kóptegen elderge saıahat jasaǵan. Basqa elderdiń mádenıetimen tanysqandy unatady eken. 2008 jyly Qytaı elinde 3 aı saıahat jasaǵan. Al, bul saparǵa deıin Ońtústik Amerıkada saıahat jasap kelgen.
Saıahattyń uıymdastyrýshysy qazaqstandyq «Burdock Inco Recruitment Services» (Býrdok Inko Rekrýtment Servısez) kompanııasy.
