Golden Horde tarıhı serıalynyń túsirilimi 2024 jyldyń kúzinde bastalady
ASTANA. KAZINFORM —«Dara» prezıdenttik bastamalar qory Karga Seven Pictures kompanııasymen birlese otyryp, Shyńǵys hannyń úlken uly Joshy hannyń ómirinen syr shertetin aǵylshyn tilindegi alty bólimdi gıbrıdti derekti dramany túsirýdi bastady. Bul týraly qordyń baspasóz qyzmeti habarlady.
Serıalda Joshy hannyń ómir tarıhy arqyly Altyn Orda ımperııasynyń damý kezeńderi kórsetiledi.
Serıalǵa kreatıvti dırektor Emre Shahınniń jetekshiligimen Karga Seven Pictures prodıýserlik etedi.
Óndiris 2024 jyldyń kúzinde Qazaqstan men Túrkııada bastalady dep josparlanyp otyr.
Karga Seven Pictures Netflix úshin 90-nan astam elde úzdik 10 serıaldyń qataryna kirgen «Imperııanyń órleýi: Osman ımperııasy» jáne «Ósıet: Musanyń basynan keshkenderi» sııaqty iri tarıhı derekti dramalardy túsirgen.
— Joshy hannyń ómir tarıhy keremet, ol álem kórermenderi arasynda úlken qyzyǵýshylyq týdyratyny sózsiz. Osy aýqymdy tarıhı jobany iske asyrý úshin Dara qorymen yntymaqtasý — biz úshin úlken mártebe, — dep atap ótti Karga Seven Pictures kreatıvti dırektory Emre Shahın.
2024 jyly Joshy ulysynyń qurylǵanyna 800 jyl tolady.
Osy ataýly dataǵa arnalǵan tarıhı derekti joba memlekettigimizdiń sanǵasyrlyq tarıhyn qamtymaqshy.
