Goldardy óz qateligimizden jiberip aldyq — «Qaırat» bapkeri pleı-off jaıly
ALMATY. KAZINFORM — ÝEFA Eýropa lıgasyna irikteýdiń pleı-off kezeńinde «Anderleht» pen «Qaırat» alǵashqy matchyn Almatyda ótkizdi.
Ortalyq stadıonda ótken match 3:0 esebimen qonaqtardyń paıdasyna sheshildi. Oıynnan keıingi baspasóz máslıhatynda Rafael Ýrazbahtın qarsylastyń deńgeıi edáýir joǵary bolǵanyn jáne komandanyń jibergen qatelikteri esepke tikeleı áser etkenin moıyndady.
— Ne aıtýǵa bolady? Ókinishke qaraı, sheberlik deńgeıi múldem bólek. Mundaı dóreki qatelikterge jol berseń, qarsylas alańda jazalaıdy. Qazaqstan chempıonatynda ótip ketse, munda múldem keshirilmeıdi. Goldardy ózimiz tilep aldyq. Qyzyl qaǵaz alǵan sát te orynsyz edi. Alań ortasynda olaı oınaýdyń esh mánin kórgenim joq, — dedi ol.
Bapkerdiń aıtýynsha, sátsiz ótken birinshi taımnan keıin komandanyń basty mindeti jınaqylyqty joǵaltpaı, qarsylasqa esep aıyrmasyn ulǵaıtýǵa múmkindik bermeý bolǵan.
— Úziliste jigitterge bastysy eńse túsirmeý kerektigin aıttyq. Alańda tutas ári júıeli oınaýdyń mańyzdylyǵyn túsindirýge tyrystyq, olar ony ekinshi taımda kórsete bildi. Mundaı qarsylasqa qarsy bir adamǵa kem oınaý óte qıyn. Barymyzdy saldyq. Úshinshi goldy jiberip alǵanda, biz úshin oıyn aıaqtaldy, — dedi bapker.
Rafael Ýrazbahtın 27 tamyzda Brıýsselde ótetin qarymta kezdesý týraly da oı bólisti. Onyń sózinshe, komandanyń tyǵyz kestesi men Qazaqstan chempıonatyndaǵy oıyndardy eskere otyryp, bapkerler shtaby qandaı baǵytqa basymdyq beretinin aıqyndap alýy tıis.
— Qarymta oıynǵa kelsek, jaqsylap oılanýymyz kerek. «Kóktegi suńqardan qoldaǵy shortan artyq» deıdi ǵoı. Bizdi alys áýe sapary kútip tur, ári aldaǵy chempıonat matchy da óte mańyzdy. Qazir qalaı oınaıtynymyzdy dóp basyp aıta almaımyn. Qarsylastyń óz alańynda qarqyndy oınaıtyny túsinikti. PAOK-pen ótken kezdesýdi de olar óte qarqyndy bastaǵan edi. Bizge negizgi basymdyqty anyqtap alý qajet, — dep jaýap berdi ol.
Baspasóz máslıhatynda Rafael Ýrazbahtın Almatydaǵy Ortalyq stadıon kógalynyń jaǵdaıyna da jeke toqtaldy.
— Alańnyń sapasy máz emes, biraq jeńilisimizdiń sebebin odan izdemeımin. Masele alańda emes. Biz birinshi taımnyń alǵashqy mınýttarynda qarapaıym ári saq oınaý kerektigin eskertkenbiz. Ókinishke qaraı, kóldeneń berilgen pasty qarsylas ustap alyp, gol soǵyp ketti, — dedi ol.
Eske salaıyq, «Qaırat» óz alańynda «Anderlehtke» 0:3 esebimen ese jiberdi. Eki komanda arasyndaǵy qarymta kezdesý 27 tamyz kúni Brıýsselde ótedi.
Sondaı-aq jeńisti oıynnan keıin Belgııa klýbynyń bas bapkeri Vıtor Brýno kezdesý jaıly pikir bildirdi.
