Gold Company LTD qazaqstandyqtardyń 9 mlrd teńgeden astam qarajatyn ıemdengen
«Qazaqstan men Reseı azamattarynan turatyn Gold Company LTD qarjy pıramıdasyn uıymdastyrýshy qylmystyq topqa qatysty isti tergeý nátıjelerin jetkizgim keldi. Olar bizdiń azamattarymyzǵa ınternettegi oıdan shyǵarylǵan ınvestıtsııalyq jobalardan joǵary paıda tabýǵa ýáde berip, 9 mlrd teńgeden astam qarajatyn ıemdengen», - dedi Sanjar Ádilov Ortalyq kommýnıkatsııalar qyzmetindegi baspasóz máslıhatynda.
Onyń dereginshe, kinálilerdiń qylmystyq áreketterinen 4 myńnan astam azamat zardap shekti.
«Atalǵan qarjy pıramıdasynyń qyzmetine Aqtóbe oblysynyń polıtsııa departamenti tosqaýyl qoıdy. Qazirgi ýaqytta is sotta», - dedi departament bastyǵy.
Aıta keteıik, 2020 jyldyń qarasha aıynda Gold company LTD JShS uıymdastyrýshylaryna qatysty qylmystyq isti tergeý aıaqtalǵany habarlanǵan bolatyn. Sol kezde atalǵan qarjy pıramıdasynan 2,5 myńnan astam azamat zardap shekkeni, keltirilgen shyǵyn mólsheri 1,5 mlrd teńgeden asqany aıtylǵan edi.
