Golboldan Qazaqstan quramasy alǵash ret altyn medal jeńip aldy

ASTANA. KAZINFORM – Jasóspirimder arasyndaǵy V Azııa Para oıyndarynda Qazaqstannyń golboldan ulttyq quramasy tarıhı jetistikke qol jetkizip, alǵash ret altyn medal ıelendi.

Týrızm jáne sport mınıstrligi málimetinshe, atalǵan jarysta Qazaqstan quramasymen birge Ońtústik Koreıa, Iran, Taıland jáne Saýd Arabııasynyń komandalary baq synady. Týrnır aınalmaly júıe boıynsha ótti.

Týrnırdiń bastapqy kezeńinde Qazaqstan quramasy Ońtústik Koreıaǵa 9:10, Iran komandasyna 3:5 esebimen jeńildi. Keıinnen komanda oıyn júıesin rettep, taktıkalyq turǵyda jınaqtalyp, kezdesý barysyn óz paıdasyna sheshe bildi. Nátıjesinde qazaqstandyq golbolshylar Saýd Arabııasyn 12:7, Taılandty 11:1 esebimen senimdi túrde jeńip, pleı-off kezeńine joldama aldy.

Jartylaı fınalda Qazaqstan quramasy Iran komandasyn 7:5 esebimen jeńip, fınaldyq básekede Ońtústik Koreıa quramasynan 9:6 esebimen basym túsip, jarystyń altyn júldegeri atandy.

Jarys qorytyndysy boıynsha Qazaqstan quramasy 1-shi oryn, Ońtústik Koreıa 2-shi oryn, Iran 3-shi orynǵa turaqtady.

– Jarys barysynda barlyǵy alty oıyn ótkizdik. Sportshylar jarysqa jaqsy daıyndyqpen keldi. Memleket qoldaýymen Almaty men Astanada oqý-jattyǵý jıyndary uıymdastyryldy. Nátıjege kóńilimiz tolady. Komanda quramyndaǵy alty sportshynyń tórteýi úshin bul alǵashqy halyqaralyq jarys bolǵanyna qaramastan, olar ózderin joǵary deńgeıde kórsete bildi, - dedi golboldan bas bapker Andreı Shpeht.

Aıta keteıik, jasóspirimder arasyndaǵy V Azııa Para oıyndary 10–13 jeltoqsan aralyǵynda Dýbaı qalasynda (BAÁ) ótti. Baıraqty básekege 45 elden 1300-den astam sportshy qatysyp, 11 sport túri boıynsha 481 medal jıyntyǵy sarapqa salyndy.

Atalǵan oıyndarda Qazaqstan quramasy 9 sport túrinen synǵa túsip, jalpy sany 68 medal jeńip aldy. Onyń ishinde 25 altyn, 23 kúmis jáne 20 qola júlde bar.

Aıta keteıik, qazaqstandyq tennısshiler Túrkııadaǵy týrnırdiń jartylaı fınalyna ótti.