Golan jotasyndaǵy qazaqstandyq áskerı qyzmetshi arý: Qaqtyǵys aımaǵyndaǵy ár sát - synaq
ASTANA. KAZINFORM - Taıaý Shyǵystyń aptap ystyǵyna qaqtalyp, týǵan jerden jyraqta, sonaý Golan jotasynda qazaqstandyq áıel-bitimgerler BUU mıssııasy quramynda qyzmet atqaryp júr. 8 naýryz qarsańynda Kazınform agenttigi keı er adamnyń ózi táýekel ete bermeıtin aýyr joldy tańdaǵan arýlar jaıly syr shertedi.
Bitimgerlik mıssııasyna bastaǵan jol
Sanııa Tilenshınova – qazirgi ýaqytta Golan bıiginde BUU bitimgerlik mıssııasynda qyzmet atqaryp júrgen Qazaqstan Qarýly kúshteriniń áskerı qyzmetshisi.
— Eń qıyn sát - daıyndyq kezeńi boldy. Іrikteýge 500-ge jýyq úmitker qatystyq. Almaty shetinde ornalasqan «Bitimger» oqý ortalyǵyna kelgenimde, maǵan bári beıtanys, jat edi: orta, ujym, komandır, oqý pánderi. Talap óte joǵary boldy, alǵashynda shydaı alamyn ba dep kúmándandym. Men ózim aýylda ósken qarapaıym qyzbyn, eshqashan úıden alys shyǵyp kórmegenmin, – deıdi ol.
Otbasy Sanııanyń talabyn qoldap, batasyn bergen. Qazirgi kezde ol úı ishimen kún saıyn habarlasyp turady.
«Bitimger» oqý ortalyǵynda bitimgerler halyqaralyq quqyq negizderin, psıhologııalyq daıyndyq pen ekstremaldy jaǵdaılardaǵy taktıkalyq áreketterdi úırenedi.
— Bizge shaıqas taktıkasynan bastap, alǵashqy medıtsınalyq kómek kórsetýge deıin barlyǵyn úıretti. Sondaı-aq jergilikti halyqpen kelissózder júrgizýdi meńgerdik. Komandırler talapshyl, qatal, biraq ádil boldy, – deıdi Sanııa.
Jiti daıyndyqtan keıin QR Qorǵanys mınıstrliginiń ofıtserleri úmitkerlerden emtıhan qabyldady. Qorytyndy kezeńde bitimgershilik mıssııasynyń shynaıy jaǵdaılaryna barynsha jaqyndatylǵan keshendi oqý-jattyǵýlar ótkizildi.
Qaqtyǵys aımaǵyndaǵy ómir
Golan jotasy – Taıaý Shyǵystaǵy strategııalyq ári saıası mańyzy bar daýly aýmaq. Qazaqstandyq bitimgerler onyń Sırııa jaq betinde qyzmet atqaryp jatyr.
— Bizdiń kúnimiz tańda dene jattyǵýlarynan bastalady. Tańǵy astan keıin jeke quram sapqa turyp, kontıngent komandıri mindetterdi belgileıdi: patrýldeý, gýmanıtarlyq júkter men BUU qyzmetlerin alyp júrý jáne basqa tapsyrmalar. Bos ýaqytta óz betimizshe daıyndalamyz nemese sportpen aınalysamyz, –— deıdi Sanııa.
Sanııanyń aıtýynsha, alǵashqyda oǵan aptap ystyq, qurǵaq klımatqa beıimdelý ońaı bolmaǵan. Biraq eń úreı týǵyzatyn jaı – bazanyń syrtynda únemi bolyp jatatyn atys, jarylys eken.
— Ótken jyly raketalar bizdiń bazamyzdyń ústinen ushyp ótken kezder boldy. Mundaıǵa úırený múmkin emes. Komanda berilgende, jeke quramnyń jartysy býnkerlerge tússe, qalǵandary bazanyń qorǵanysyn qamtamasyz etti. Biraq qazir bári tynysh, - deıdi bitimger.
Sanııa úshin eń qıyn sátter alǵashqy patrýldeý júrgizý sáti bolǵan.
— Bul kún meniń esimde máńgi qalady. Bizdiń kóligimizge jalańaıaq kishkentaı balalar júgirip keldi. Olar ash boldy, sý men tamaq surady. Keıin jergilikti áıeldermen kezdestim. Olar bastan keshken qıyndyqtaryn aıtyp berdi. Olardyń qaısarlyǵy, tózimdiligi, ómirge degen sheksiz qulshynysy – meni tańǵaldyrdy, – deıdi Sanııa.
Mundaı sátterde, onyń aıtýynsha, ár bitimger bul jerdegi qyzmetiniń mańyzdylyǵyn tereń túsine bastaıdy.
— Eger men qaqtyǵys aımaǵynda turatyn adamdarǵa úndeý jasaı alsam, «Sizderge túsken aýyrtpalyqty, kúresterińiz ben tózimdilikterińizdi kórip otyrmyz. Biz sizderdiń qandaı jaǵdaıǵa tap bolǵandaryńyzdy túsinemiz. Bizdiń mıssııamyz – kelisimderdi qadaǵalaý ǵana emes, sizderdiń jalǵyz emestikterińizdi álemge jetkizý» der edim. Men qaqtyǵys jaǵdaıyndaǵy ómirdiń ár sáti synaq ekenin túsindim. Biz beıbitshilik ornatý múmkin ekenine senemiz, – deıdi áskerı qyzmetshi.
Qaıǵyly oqıǵa kýágerleri
2024 jylǵy 27 shildede bitimgerler qaıǵyly oqıǵaǵa kýá bolady.
— BAQ-tar málimdegendeı, «Hezbolla» atqan jarylǵysh snarıad Golan jotalarynyń soltústik jaǵyndaǵy drýzdardyń Madjdal Shams qalasyna túsedi. Ol fýtbol alańynda jarylyp, 12 jasóspirim qaza tapty https://kaz.inform.kz/news/frantsmyada-zhumistamiz-eldosti-koldauga-suranip-keldk-kazakstandik-azamattar-382247/, - deıdi qazaqstandyq bitimgershilik kontıngentiniń shtab ofıtseri, maıor Nurjan Musaıypov.
Onyń aıtýynsha, qazaqstandyq kontıngent Sırııa jaǵynda jumys isteıtindikten, jeke quramǵa qaýip tónbegen. Alaıda bul oqıǵa óńirdegi jaǵdaıdyń qanshalyqty turaqsyz ekenin kórsetti.
Qazaqstandyq bitimgerler qandaı mindetter atqarady?
Qazaqstandyq bitimgerler Golan jotasynda keń aýqymdy mindetterdi oryndaıdy:
— jedel den qoıýdy jáne shuǵyl medıtsınalyq evakýatsııany qamtamasyz etý;
— baqylaý beketterin jáne basqa mıssııa pozıtsııalaryn nyǵaıtý;
— ózderi jaýapty aımaqty patrýldeý,
— jarylmaǵan oq-dáriler men jarylǵysh zattardan tazalaý,
— BUU qyzmetkerleri men qurmetti qonaqtaryn alyp júrý.
— Biz ártúrli kontıngent ókilderimen, halyqaralyq shtab qyzmetkerlerimen jáne mıssııada jumys isteıtin jergilikti áıeldermen tyǵyz qarym-qatynastamyz. Árkimniń qyzmetke degen kózqarasy ártúrli, biraq barlyǵymyzdy ortaq sezim – Otanǵa degen súıispenshilik pen óz isimizge adaldyq biriktiredi. Mıssııaǵa 12 elden ókilder qatysýda. Bizdiń bitimgerler óz isine joǵary jaýapkershilikpen qaraıdy jáne praktıkalyq daǵdylardy da, teorııalyq bilimderin de únemi jetildirip otyrady. Olar áriptesteri arasynda úlken qurmetke ıe, – deıdi Sanııa.
BUU genderlik teńdik saıasatyn ustanyp, bitimgerlik operatsııalarǵa qatysatyn áıelder sanyn arttyrýǵa tyrysady. Alaıda mindetterdi oryndaý talaby barlyq qyzmetkerler úshin birdeı.
— Osy mıssııadan alǵan eń mańyzdy sabaǵym – beıbit ómirdiń qundylyǵy. Jaqyndaryń janyńda bolyp, kók aspan astynda tynysh ómir súrý – biz kóbine qadirin bilmeıtin baqytymyz, – deıdi ol.
Qazir Golan bıiktiginde Qazaqstan Qarýly kúshteriniń tórt áıel áskerı qyzmetshisi bar.
— Osy erekshe kúni men Qazaqstannyń barlyq áıelderin kóktem men sulýlyq merekesimen quttyqtaǵym keledi! Sizder – kún saıyn kúsh-jigerimen, danalyǵymen jáne meıirimimen shabyt syılaıtyn naǵyz batyrsyzdar. Otbasynyń tiregi bolyp, bala ósirip, qyzmette jetistikke jetip jáne jaqyndaryna janashyr bola biletin erekshe jansyzdar! – deıdi Sanııa.
Eske salsaq, osydan týra bir jyl buryn Qazaqstandyq bitimgerler Golan bıiktiginde derbes mıssııaǵa kiristi.