Golan jotasynda otandyq «Arlan» áskerı tehnıkasy synaqtan ótedi
ASTANA. KAZINFORM – Qorǵanys mınıstrligi Kazinform saýalyna joldaǵan jaýabynda Qazaqstannyń tuńǵysh derbes bitimgerlik kontıngenti sapynda Taıaý Shyǵystyń Golan jotasyna qandaı áskerı tehnıka aparylatynyn málim etti.
«Kontıngent tehnıkasynyń sany – 26 dana. Onyń ishinde 15 dana «Arlan» jaýyngerlik dóńgelekti kólikteri, 4 dana «Kamaz» áskerı-tasymaldaý kóligi, 6 dana ótimdiligi joǵary «Toıota Pıkap» kóligi, 1 shaǵyn avtobýs (tek kontıngenttiń ornalasý lagerinde qoldanylady)», - delingen jaýapta.
Buǵan deıin Golan jotasyna bitimgerlik kontıngent joldaý bıýdjetke qansha salmaq túsiretini aıtylǵan.
«Atalǵan soma – Qazaqstan bitimgershilik kontıngentin Qazaqstan aýmaǵynan BUU-nyń Golan bıiktikterindegi mıssııasyna tasymaldaý úshin bólinetin qarajat. Osy tasymaldaýdy uıymdastyrýǵa qatysty ártúrli múmkindikterdi eskere otyryp (kompanııanyń usynatyn qyzmetteri, qoldanatyn ushaqtyń túrleri, shyǵatyn áýejaıdyń ornalasýy) 8 mln AQSh dollaryna deıingi qarajat bolady. Kelissózder júrgizilip jatyr, soma naqtylanady. Bul soma tolyǵymen tasymaldaýǵa jumsalatyn bolady», - dep jazylǵan mınıstrlik málimetinde.
Eske salaıyq, 19 qańtar kúni Parlament qazaqstandyq áskerılerdiń BUU mıssııalaryna qatysý týraly Joldaýyn maquldady.
Atalǵan usynys boıynsha, Qazaqstannyń tuńǵysh derbes bitimgerlik kontıngenti myna nysandarǵa:
• Birinshi — Golan jotasynda bóliný protsesterin baqylaý kúshterine;
• Ekinshi — bitimge kelý sharttarynyń oryndalýyn baıqaý organyna;
• Úshinshi — Ońtústik Sýdan Respýblıkasyndaǵy mıssııaǵa;
• Tórtinshi — áýedegi qaýipsizdikti qamtamasyz etý ýaqytsha kúshterine qatysý úshin jalpy sany 430 adamnan aspaıtyn kontıngentti jiberý kózdelip otyr.
