Golan jotasynda qyzmet atqarǵan qazaqstandyq bitimgerler elge oraldy
ASTANA. KAZINFORM — Almaty halyqaralyq áýejaıynda Golan jotasyndaǵy BUU mıssııasy quramyndaǵy qyzmetin abyroımen aıaqtaǵan Qazaqstannyń ekinshi ulttyq bitimgerlik kontıngenti áskerı qyzmetshilerin saltanatty túrde qarsy alý rásimi ótti.
Qorǵanys mınıstrligi baspasóz qyzmetiniń málim etkenindeı, áýe qorǵanysy kúshteriniń A-400 áskerı-kóliktik ushaǵy Almatyǵa 70 áskerı qyzmetshini jetkizdi. Olardy qurmet qaraýyl rotasy men áskerı orkestr sán-saltanatpen qarsy aldy. Bitimgerlerdi kútip alýǵa Qurlyq áskerleri qolbasshylyǵynyń, Bitimgerlik operatsııalar ortalyǵynyń ókilderi, Qarýly kúshterdiń ardagerleri, qarýlas dostary jáne saǵyna kútken et jaqyndary men týǵan-týystary jınaldy.
Saltanatty sharada Qarýly kúshter Qurlyq áskerleriniń bas qolbasshysy general-maıor Mereke Kóshekbaev sóz sóılep, bitimgerlerdi quttyqtady.
— Qazaqstan — árqashan beıbitshilikti, turaqtylyqty jáne halyqaralyq qaýipsizdikti qoldaıtyn memleket. Búginde elimizdiń BUU aıasyndaǵy bitimgerlik qyzmeti jańa deńgeıge kóterildi. Golan jotasyndaǵy operatsııaǵa qatysý arqyly biz tolyqqandy bitimgerlik áleýeti bar memleketterdiń qataryna qosyldyq. Bul bizdiń áskerı qyzmetshilerimizdiń joǵary daıyndyǵyn jáne armııamyzdyń halyqaralyq talaptarǵa saı kúrdeli tapsyrmalardy oryndaýǵa qaýqarly ekenin dáleldeıdi, — dedi Mereke Kóshekbaev.
Bas qolbasshy, sondaı-aq, jaýyngerler elden jyraqta júrgende tózimdilik tanytyp, tileýles bolǵan bitimgerlerdiń otbasylaryna erekshe alǵysyn bildirdi.
Elge oralǵan toptyń jetekshisi maıor Ánýar Arynǵazıevtiń aıtýynsha, qyzmet atqarý kezeńinde ekinshi bitimgerlik kontıngent myńnan astam tapsyrmany sátti oryndaǵan. Atap aıtqanda, 798 ret patrýldeý júrgizse, 56 jattyǵý jıynyn ótkizip, 63 jarylǵysh zattyń kózin joıdy. Sonymen qatar, resmı tulǵalardy 15 ret aman-esen alyp júrýdi qamtamasyz etip, 57 ýaqytsha baqylaý beketin qurdy.
Bitimgerlerdiń otbasylarymen qaýyshqan kezi saltanatty is-sharanyń eń áserli sáti boldy. Saǵynysqan aǵaıyn-týystary jaýyngerlerdi zor qýanyshpen jáne maqtanysh sezimimen qushaq jaıa qarsy aldy.
— Búgin Golan jotasyndaǵy BUU mıssııasy quramynda kúrdeli ári jaýapty mindetterdi atqarǵan otaǵalarymyz úıge oraldy. Olar úshin qatty ýaıymdap, taǵatsyzdana kúttik. Sondyqtan búgingi kún biz úshin erekshe, — dedi efreıtor Erkebulan Qadıevtiń jubaıy Perızat Qadıeva.
Qazaqstandyq áskerı qyzmetshilerdiń BUU-nyń bitimgerlik mıssııalaryna qatysýy elimizdiń halyqaralyq bedelin nyǵaıtýǵa, jeke quramnyń kásibı daıarlyǵyn shyńdaýǵa jáne sheteldik kontıngenttermen ózara is-qımyldy keńeıtýge zor úles qosady. Osylaısha, Qazaqstan halyqaralyq qaýipsizdik, turaqtylyq pen yntymaqtastyq qaǵıdattaryna adaldyǵyn taǵy bir márte dáleldep otyr.
Aıta keteıik, bitimgerlerdiń ekinshi toby elge 28 mamyrda keledi dep josparlanǵan.
Buǵan deıin bitimgerlerdiń úshinshi quramy Golan jotasyna attanǵanyn jazǵan edik.
