Golan jotasyna baratyn qazaqstandyq áskerılerdiń sany artýy múmkin be – mınıstrlik jaýaby
ASTANA. KAZINFORM – Qazaqstannyń derbes bitimgerlik kontıngentiniń Parlament bekitken sany ózgertilýi múmkin. Bul týraly Qorǵanys mınıstriniń orynbasary Darhan Ahmedıev Kazinform saýalyna joldaǵan jaýabynda jazdy.
«430 degen san QR Parlamentiniń QR Qarýly Kúshterine bergen bitimgerlerdiń shekti sany. Alaıda, Qazaqstan Qarýly Kúshteri qazirgi ýaqytta birden 430 áskerı qyzmetshini joldamaıdy. Bul orta jáne uzaq merzimdi kezeńge qoıylǵan jospar. Golan bıiktikterine 139 áskerı bitimger joldanatyn bolady. Eger de BUU-nyń qajettiligi bul sannan asatyn bolsa, Qazaqstan Respýblıkasy zańnamasynda kórsetilgen sáıkesinshe protsesten qaıtadan ótip, QR Parlamentiniń jańa qaýlysy qajet bolady», - delingen jaýapta.
Mınıstrdiń orynbasary Golan jotasyna baratyn 139 áskerıdiń bitimgerlik qyzmetiniń merzimi týraly da málimet berdi.
«Alǵashqy kontıngenttiń mıssııada bolý merzimi 12 aı bolady. Kelesi kontıngentter de mıssııada 12 aı bolady dep josparlanýda. Bul merzim BUU-nyń basqa elderdiń kontıngentterine beretin usynysy (rekomendatsııa) bolyp tabylady», - dep jazylǵan resmı jaýapta.
