Golan jotalaryndaǵy qazaqstandyq bitimgerler medalmen marapattaldy
ASTANA.KAZINFORM – Bitimgerlik mıssııanyń qolbasshysy Gana Respýblıkasy armııasynyń general-maıory Anıta Asma Qazaqstannyń áskerı qyzmetshilerine Birikken Ulttar Uıymynyń mıssııasyna qatysqany úshin medaldar tabys etti. Bul týraly QR Qorǵanys mınıstrligi málimdedi.
Qazaqstannyń derbes bitimgerlik kontıngenti Sırııa Arab Respýblıkasyndaǵy Golan jotalaryndaǵy atysty toqtatý rejımin qamtamasyz etý jónindegi mindetterdi oryndaı otyryp, Faýar bazasynda qyzmet atqaryp jatyr. Barlyq 139 áskerı qyzmetshi men tórt shtab ofıtseri BUU-nyń marapatyn aldy.
Qazaqstandyq áskerı qyzmetshiler uıymnyń bazalaryndaǵy qorǵanysty kúzetýdi jáne nyǵaıtýdy qamtamasyz etip, jergilikti turǵyndarmen ózara qarym-qatynas jasaıdy. 11 aıdyń ishinde bitimgerler 200-ge jýyq jarylmaǵan snarıadty zalalsyzdandyrdy jáne medıtsınalyq kómekke muqtaj BUU-nyń qyzmetkerin evakýatsııalady.
Ótken jyldyń jeltoqsan aıynda ómirine jáne densaýlyǵyna qaýipti aımaqtan BUU personalyn evakýatsııalaý kezinde kontıngenttiń jeke quramy kásibı daıarlyq, kelisim jáne jedel is-qımyl jasap, joǵary deńgeıin kórsetti.
– BUU Bas hatshysynyń bitimgerlik operatsııalar jónindegi orynbasary Jan-Per Lakrýa jáne BUU-nyń bólingen aımaqty baqylaý mıssııasynyń (UNDOF) qolbasshysy Gana Respýblıkasy armııasynyń general-maıory Anıta Asma áskerı qyzmetshilerimizdiń jaýyngerlik daǵdysy, tártibi jáne moraldyq-erik kúshi joǵary ekenin atap ótti. Bul bizdiń beıbitshilik pen halyqaralyq qaýipsizdikti saqtaýǵa qosqan úlesimiz, – dedi bitimgerlik rotasynyń komandıri podpolkovnık Jiger Aıpov.
Esterińizge sala ketsek, 2024 jyldyń naýryz aıynda Qazaqstan Golan jotalarynda tuńǵysh derbes bitimgerlik kontıngentin ashyp, tarıhı qadam jasady. Qazaqstan áskerı qyzmetshileriniń bitimgerlik mıssııalarǵa qatysý geografııasynyń keńeıýi elimizdiń áskerı jáne gýmanıtarlyq daǵdarystardan zardap shegetin adamdarǵa qoldaý kórsetýge degen nıetin aıǵaqtaıdy.
QR Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajetti shara qabyldap jatqanyn jazǵan bolatynbyz.