Golan jotalaryndaǵy qazaqstandyq bitimgerler BUU medaldarymen marapattaldy

ASTANA. KAZINFORM – Golan jotalarynda qyzmet atqaryp júrgen qazaqstandyq áskerı qyzmetshiler minsiz qyzmeti úshin Birikken Ulttar Uıymy medaldarymen marapattaldy.

Bitimgerlik mıssııasynyń qolbasshysy general-maıor Anıta Asma Qazaqstannyń áskerı qyzmetshilerine BUU medaldaryn tabys etti. Qazaqstandyq derbes bitimgerlik kontıngent Faýar bazasynda qyzmet atqaryp, Sırııa Arab Respýblıkasyndaǵy Golan jotalarynda atysty toqtatý rejımin qamtamasyz etý jónindegi mindetterdi BUU-nyń ajyratýdy qadaǵalaý kúshteri quramynda oryndap keledi. Medal mıssııada júrgen barlyq 139 áskerı qyzmetshige berildi.

Qazaqstandyq bitimgerler Uıym bazalaryn kúzetý jáne qorǵaý sharalaryn kúsheıtip, jergilikti turǵyndarmen ózara is-qımyl júrgizedi, sondaı-aq jaýapkershilik aımaǵynda turaqtylyqty saqtaýǵa baǵyttalǵan mindetterdi atqarady.

– Kontıngenttiń jeke quramy joǵary kásibı daıarlyqty, úılesimdilik pen jedel áreket etý qabiletin kórsetip otyr. BUU medali – árbir áskerı qyzmetshiniń batyldyǵy men tártibiniń, óz isine adaldyǵynyń jáne beıbitshilikti saqtaý isine qosqan úlesiniń moıyndalýy, – dedi bitimgerlik rotasynyń komandıri Jánibek Nurlanov.

2025 jylǵy sáýirden beri kontıngent 55 tapsyrmany oryndap, 1200-den astam jarylǵysh zat pen 43 qoldan jasalǵan jarylǵysh qurylǵyny zalalsyzdandyrdy. Jalpy, mıssııa bastalǵaly beri qazaqstandyq bitimgerlik kontıngenttiń ekinshi quramy 675 tapsyrmany oryndaǵan.

Eske salaıyq, Qazaqstan Golan jotalarynda alǵashqy derbes bitimgerlik kontıngentin 2024 jylǵy naýryz aıynda ornalastyrǵan bolatyn.