Golan jotalarynda qazaqstandyq bitimgerlerdiń josparly rotatsııasy ótti
ASTANA.KAZINFORM - BUU mıssııasynyń jaýapkershilik aımaǵyndaǵy Faýar bazasynda Desanttyq-shabýyldaý áskerleri qolbasshysynyń orynbasary polkovnık Ulan Nurǵazıevtiń jetekshiligimen qazaqstandyq bitimgerlik kontıngentterdiń rotatsııasy ótti, dep habarlaıdy QR Qorǵanys mınıstrliginiń baspasóz qyzmeti.
BUU-nyń «Bólingen aýmaqty baqylaý kúshteri» mıssııasy qolbasshysynyń rezervindegi ekinshi jáne úshinshi bitimgerlik rotalardyń komandırleri podpolkovnıkter Jánibek Nurlanov pen Іlııas Almatov Desanttyq-shabýyldaý áskerleri qolbasshylyǵynyń ókiline áskerı kontıngentterdiń aýysqany jaıly baıandady.
Saptyq alańdaǵy Qazaqstan Respýblıkasynyń Memlekettik Týyn tapsyrýdyń saltanatty rásimi aldyńǵy quramnyń qyzmetti aıaqtap, jańa kontıngent mıssııasynyń bastalǵanyn bildirdi.
Úshinshi bitimgerlik kontıngent rotasynyń qolbasshylyǵyn qabyldaǵan podpolkovnık Іlııas Almatov daıyndyq barysynda meńgerilgen kásibı daǵdylar áskerı qyzmetshilerge júktelgen mindetterdi tıimdi oryndaýǵa múmkindik beretinin atap ótti.
Mıssııany oryndaý kezeńinde ekinshi bitimgerlik kontıngent myńnan astam is-shara ótkizdi. Injenerlik-saperlik top tórt myńǵa jýyq jarylys qaýpi bar zat pen qoldan jasalǵan jarylǵysh qurylǵyny joıdy.
Bitimgerler baqylaý beketterindegi qaýipsizdikti qamtamasyz etip, aýmaqty patrýldedi, gýmanıtarlyq júkterdi alyp júrdi, evakýatsııa jumystaryn júrgizip, jergilikti turǵyndarǵa medıtsınalyq kómek kórsetti.
Bazaǵa kelgen úshinshi bitimgerlik kontıngenttiń áskerı qyzmetshileri ornalasýǵa jáne isterdi qabyldaý jumystaryna kirisip ketti. Rota shtaby jeke quramnyń qyzmettik mindetterin naqtylap, BUU-nyń mandatynda kózdelgen tapsyrmalardy oryndaýǵa daıyndyqty uıymdastyratyn bolady.
Buǵan deıin Almatyda Golan jotasynan oralǵan bitimgerlerge qurmet kórsetilgeni týraly jazdyq.
Aıta keteıik, búgin – Qazaqstan Respýblıkasynyń Bitimger kúni.
Osy kúnge oraı Kazinform arnaıy daıyndaǵan taldaý materıaldy myna siltemeden oqyńyzdar.
