Golan jotalarynda qazaqstandyq bitimgerler alǵashqy jattyǵýyn pysyqtady
ASTANA. KAZINFORM – Qazaqstandyq bitimgerlik rotanyń jedel áreket etý kúshteri ırlandııalyq áriptesterimen jaralanǵan adamdy evakýatsııalaý boıynsha birlesken jattyǵý ótkizdi, dep habarlaıdy QR Qorǵanys mınıstrliginiń baspasóz qyzmeti.
Baspasóz qyzmetiniń habarlaýynsha, dabylmen kóterilgen bólimshe tez arada Golan jotalarynda BUU mıssııasynyń jaýapkershilik aımaǵyndaǵy bazadan birneshe shaqyrym jerde ornalasqan baqylaý beketine ketti.
Jattyǵýdyń birinshi kezeńinde bekettiń aýmaǵyn tazartý jáne tekserý jumystary júrgizildi.
Sodan keıin medıtsınalyq bólim jaralanǵan adamǵa jedel kómek kórsetti. Ol arnaıy jabdyqtalǵan brondy dóńgelekti kólikpen evakýatsııalandy.
Qazaqstandyq bitimgerler mıssııanyń jaýapkershilik aımaǵyndaǵy baqylaý beketterin kúsheıtýge jaýapty ekenin atap ótken jón. Qajet kezde olar evakýatsııa da júrgizedi.
