Golan jotasynda 139 qazaqstandyq bitimger qyzmet etip júr
ASTANA. KAZINFORM – Qorǵanys mınıstrliginiń delegatsııasy ınspektsııalyq saparmen Golan jotalaryndaǵy BUU Kúshteriniń bólingen aımaqty baqylaý jónindegi mıssııa oryndalatyn óńirge bardy.
Sapardy QR Qarýly kúshteri Qurlyq áskerleriniń bas qolbasshysy general-maıor Mereke Kóshekbaev basqardy.
Sapar barysynda mıssııa qolbasshylyǵymen kezdesý ótip, onyń sheńberinde Birikken Ulttar Uıymynyń bólingen aımaqty baqylaý mandatyn iske asyrý máseleleri, óńirdegi ahýal men qazaqstandyq kontıngenttiń qyzmeti talqylandy.
Mıssııa basshysy jáne BUU bólingen aımaqty baqylaý jónindegi kúshteriniń qolbasshysy general-maıor Anıta Asma qazaqstandyq bitimgerlerdiń qoıylǵan mindetterdi sapaly oryndaǵany úshin alǵysyn bildirip, olardyń is-qımylyn, kásibıligin, tártibi men úılesimdi áreketin joǵary baǵalady.
Qazaqstandyq ulttyq kontıngent jedel áreket etý bólimshesiniń fýnktsııalaryn oryndap, mobıldi patrýldeýdi júzege asyrady, jedel áreket etý toptarynyń daıyndyǵyn, medıtsınalyq evakýatsııalaýdy jáne ınjener-saperlerdiń ilesip júrýin qamtamasyz etedi. Odan basqa baqylaý beketterinde de mindetter oryndaıdy.
Mıssııaǵa qatysa bastaǵannan beri ulttyq kontıngent 675, onyń ishinde 500-den asa patrýldeýdi, jattyǵý is-sharalaryn ótkizýdi, jarylys qaýpi bar zattardy zalalsyzdandyrý operatsııalaryn, lekterdi alyp júrýdi jáne ýaqytsha baqylaý beketterin qoıýdy oryndady.
Qazirgi ýaqytta Golan jotalarynda 139 qazaqstandyq bitimger qyzmet etip júr.
Aıta ketelik qazaqstandyq saperler Golan jotasynda 1200-den asa jarylǵysh zatty joıdy.