Golan jotalarynan elge 38 bitimger oraldy
ASTANA. KAZINFORM – BUU-nyń Golan jotalaryndaǵy mıssııasynda alǵashqy bitimgerlik kontıngent quramynda qyzmet etken áskerı qyzmetshilerdi astanalyq áskerı avıatsııa bazasynda qoshemetpen kútip aldy. Bul týraly Qorǵanys mınıstrliginiń baspasóz qyzmeti habarlady.
Bitimgerlerdi Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Shaıh-Hasan Jazyqbaev qarsy aldy. Qolbasshylyq ókili olarǵa adal qyzmeti jáne beıbitshilik pen halyqaralyq qaýipsizdikti nyǵaıtýǵa qosqan úlesi úshin alǵysyn bildirdi.
Dál osy reıspen elordaǵa ekinshi ulttyq kontıngenttiń komandalyq quramyna laýazym men isterdi berý úshin Faýardyń bitimgerlik bazasynda qalǵan 38 áskerı qyzmetshi keldi.
Esterińizge sala ketsek, bir jyl ishinde halyqaralyq standarttar men talaptar boıynsha jaraqtandyrylǵan derbes qazaqstandyq bitimgerlik kontıngent BUU mıssııasynyń mandatyna sáıkes qarsylas taraptar arasynda atysty toqtatý rejımin qoldaýmen aınalysqan. Jaýapkershilik aımaǵynda jeke quram 600-den asa tapsyrmany oryndady. Qazaqstandyq bitimgerlerdiń qyzmeti BUU mıssııasy men hatshylyǵy basshylyǵy tarapynan joǵary baǵalandy.
Aıta ketelik qazaqstandyq bitimgerler Sırııada qandaı mindetti oryndap kelgeni týraly jazǵan edik.