Gogoldiń «Óli jandary» Pavlodar mektepterin áli de jaǵalap júr

PAVLODAR. KAZINFORM — Mektep dırektory jalǵan qyzmetkerdi jumysqa qabyldaý arqyly bıýdjetten 2,5 mln teńge qarajat jymqyrǵan. Qazir oǵan qatysty sotqa deıingi tergeý bastaldy.

Prokýrorlar Pavlodar qalasyndaǵy mektep dırektorlarynyń biri iri kólemdegi bıýdjet qarajatyn urlaǵanyn áshkereledi. Ol bilim uıasyna áldebir azamatty jumysqa alyp, sonyń atyna aı saıyn eńbekaqy aýdaryp otyrǵan. Túptep kelgende álgi azamat mektepte jumys istemegen. Sóıtip Gogoldiń áıgili «Óli jandar» shyǵarmasynyń kezekti keıipkeri atanyp otyr.

«Dırektordyń qyzmetkerdi jumysqa jalǵan ornalastyrý arqyly 2,5 mln. teńge ıemdený faktisi anyqtaldy. Materıaldar Sybaılas jemqorlyqqa qarsy qyzmetke joldandy. Qylmystyq kodekstiń 189-baby (senip tapsyrylǵan bótenniń múlkin ıemdený nemese jymqyrý) boıynsha sotqa deıingi tergep-tekserý júrgizilip jatyr» dep habarlady óńirlik prokýratýradan.

Sonymen qatar prokýrorlar Pavlodar qalasynyń barlyq mektepterinde beınebaqylaý kameralary jazý fýnktsııalarysyz jumys isteıtinin anyqtady. Olardyń beıne muraǵattaryna kirý múmkindigi joq jáne polıtsııanyń Jedel basqarý ortalyǵyna qosylmaǵan.

Bul kemshilik 2023 jyly «Smart City Pavodar» jobasy aıasynda túzetilýge tıis bolatyn, alaıda jetkizýshiniń sharttyq mindettemelerdi oryndamaýyna baılanysty áli iske asyrylmaǵan.

Jergilikti atqarýshy organdar oǵan qatysty narazylyq-talap qoıý jumystaryn júrgizip jatyr. 

Barlyq anyqtalǵan faktiler boıynsha prokýrorlyq qadaǵalaý sharalary qabyldandy.

Eske sala keteıik, buǵan deıin Pavlodarda balabaqsha dırektory men býhgalteri qazynadan 62 mln teńge jymqyrǵany týraly habarlaǵan edik.