Godýnova bıýdjetke salyqtyń artyq tólenýi jaıly: Adal kásipkerlerdiń nápaqasyn alyp otyrmyz

NUR-SULTAN. QazAqparat – Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova bıýdjetke salyqty artyq tóleıtin kásipkerlerdiń máselesin kóterdi, dep habarlaıdy QazAqparat tilshisi.

«Salyqtyq túsim qurylymynda júıeni quraýshy negizgi salyqtyń mólsheri azaıyp barady. Men korporatıvti tabys salyǵy (KTS) týraly aıtyp otyrmyn. Ol 30 paıyzǵa qysqardy. Aıtpaqshy bul kórsetkish jaǵymsyz tendentsııa men bıznestiń ahýalynan habar beredi. Respýblıkalyq bıýdjetke salyq túsimderiniń artyq tólenip ketý mólsheri ótken jyldan qaraǵanda 170 mlrd teńgege tómendedi. Bul áli de aıtarlyqtaı kóp soma emes. Bul – memleketke tólenbeýi tıis qarajat bolatyn! Munyń jartysy esepke alynyp, bıznes ókilderine osy jyldyń birinshi jartyjyldyǵynda qaıtarylady. Biz adal kásipkerlerdiń nápaqasyn alyp otyrmyz», - dedi Natalıa Godýnova Parlament Senatynda 2019 jylǵy respýblıkalyq bıýdjettiń atqarylýy týraly esepti baıandaý kezinde.

Esep komıtetiniń basshysy sonymen birge bıznes ókilderiniń artyq tólep ketken qarajatynyń mólsherin azaıtý jumysyn da synǵa aldy.

«Ol da úlken suraq. Esep komıtetiniń tańdaý arqyly júrgizilgen aýdtıtimen 8 salyq tóleýshiniń artyq tólendi-aý degen salyǵy 30 mlrd teńgege negizsiz tómendetilgeni anyqtaldy. Bul sharýany statıstıkalyq kórsetkishterin jaqsartý úshin Qaraǵandy, Aqtóbe, Qostanaı, BQO men ShQO, Nur-Sultan qalasynyń memlekettik kirister organdary atqarǵan. Sol úshin KTS-ty tóleý tártibin qaıta qaraǵan abzal», - dedi ol.