Gobı shóliniń erekshe qorǵalatyn tabıǵı aýmaǵy memlekettik nagrada aldy

ASTANA. KAZINFORM — Mońǵolııa Prezıdentiniń jarlyǵymen «Úlken Gobı» tabıǵı qoryǵynyń dırektsııasy «Altan gadas» (Temirqazyq) ordenimen marapattaldy. Bul týraly Montsame agenttigi jazdy. 

Mońǵolııa Prezıdentiniń jarlyǵyna sáıkes, 50 jyldyq mereıtoıyna oraı «Úlken Gobı» tabıǵı qoryǵynyń dırektsııasy eldiń eń joǵary marapattarynyń biri — «Altan gadas» (Polıarnaıa zvezda) ordenine ıe boldy.

Erekshe qorǵalatyn tabıǵı aýmaqtar basqarmalarynyń keńes jıyny barysynda Mońǵolııa Prezıdenti Ákimshiliginiń basshysy Altanhýıagıın Ýılstýgýldýr Prezıdent Ýhnaagıın Húrelsúhtiń quttyqtaý hatyn oqyp, nagradany resmı túrde tabystady.

Qorshaǵan orta jáne klımattyń ózgerýi mınıstri Batyn Batbaatar óz sózinde «Altan gadas» ordeni — qorshaǵan ortany qorǵaý salasynda berilgen alǵashqy ári eń bedeldi memlekettik marapat ekenin atap ótti.

1975 jyly Mońǵolııanyń Uly Halyq Hýraly Prezıdıýmynyń № 84 qaýlysymen «Úlken Gobı» tabıǵı qoryǵyn erekshe qorǵalatyn aýmaq retinde qurý — tek Mońǵolııa úshin ǵana emes, búkil álem úshin mańyzdy oqıǵa boldy. Bul sheshim álemdegi on iri buzylmaǵan ekojúıeniń biri sanalatyn Gobı shóliniń sırek kezdesetin, biregeı tabıǵı aımaǵyn tolyq saqtap qalýǵa negiz qalady. Mundaǵy ekojúıe adam qolynan ózgermeı, alǵashqy tabıǵı kúıinde saqtalǵan.

Qoryq aımaǵy óziniń florasy men faýnasynyń baılyǵyna, ekologııalyq qundylyǵyna jáne qatań qorǵalatyn aýmaq retindegi mańyzdylyǵyna baılanysty halyqaralyq deńgeıde moıyndaldy.

Qoryq qurylǵan kúnnen bastap «Úlken Gobı qoryǵyn damytý», «Tahıdy (Prjevalskıı jylqysy) qaıta jersindirý», «Úlken Gobıdiń ekojúıesi men ındıkatorlyq túrlerin qorǵaý», «Gobı aıýy (Mazaalaı)», «Havtgaı (jabaıy qos órkeshti túıe) kóbeıtý» jáne «Mońǵolııanyń biregeı tabıǵı ortasyn saqtaý jáne turaqtylyǵyn qamtamasyz etý» sııaqty iri ulttyq jáne halyqaralyq jobalar júzege asyryldy.

Monǵolııa, Germanııa, AQSh, Frantsııa, Nıderlandy, Ulybrıtanııa, Qytaı jáne Chehııa ǵalymdarynyń zertteýleri nátıjesinde bul aýmaqta 350-den astam tahı, 52 mazaalaı, shamamen 11 myń qulan jáne 8 myńǵa jýyq qaraquıryq mekendeıtini rastaldy. Bul popýlıatsııalar jyl saıyn turaqty ósip keledi.

Bul tek bıoalýantúrlilikti saqtaýǵa ǵana emes, sonymen birge jergilikti qaýymdastyqtardyń ómir sapasyn jaqsartýǵa, olardyń tabıǵatty qorǵaý isine qatysýyn keńeıtýge, balalar men jastar arasynda ekologııalyq bilimdi damytýǵa jáne qoǵamnyń ekologııalyq sanasyn arttyrýǵa zor úles qosyp keledi.

Aıta keteıik, Mońǵolııa alǵash ret ıÝNESKO Álemdik mura komıtetine saılandy.