Goadaǵy túngi klýbta bolǵan órtten 23 adam qaza tapty — resmı derek

ASTANA. KAZINFORM — Úndistannyń Goa jaǵalaý aımaǵyndaǵy tanymal túngi klýbta bolǵan órtten keminde 23 adam qaza tapty, dep habarlady jergilikti bılik. Bul týraly VVS jazdy.

Qaza tapqandardyń kópshiligi Soltústik Goadaǵy Arpora qalasyndaǵy klýb qyzmetkerleri, órt qurbandarynyń qatarynda týrıster de bar.

Polıtsııanyń málimetinshe, aldymen klýb ashanasyndaǵy gaz ballony jarylyp, keıin qaýlaǵan órt klýbty túgel sharpyǵan.

«Búgin biz úshin óte qaıǵyly kún», dedi Goa bas mınıstri Pramod Savant óz málimdemesinde.

Al Goa polıtsııasynyń bastyǵy Shrı Alok Kýmardyń aıtýynsha, máıitterdiń kóbi ashana mańynan tabylǵan, bul qurbandardyń klýbta jumys istegenin kórsetedi.

«Órt negizinen birinshi qabattaǵy ashana mańynda bolǵan. Órt tún ortasynda shyqty. Qazir ol baqylaýǵa alyndy», dedi ol.

Indian Express basylymynyń habarlaýynsha, órt Baga jaǵalaýynda ornalasqan Birch by Romeo Lane atty klýbta shyqqan, bul aımaqtaǵy eń tanymal jaǵajaılardyń biri.

Jergilikti BAQ derekterine sáıkes, jeksenbi kúni tańerteń qutqarý jumystary jalǵasqan.

Dr. Savant jýrnalısterge bergen málimdemesinde úsh adamnyń kúıik jaraqatynan, al qalǵandarynyń tunshyǵýdan qaıtys bolǵanyn habarlady.

Sondaı-aq órt kezinde úsh-tórt týrıst qaza tapqan. Olardyń jasy men azamattyǵy áli belgisiz.

Bas mınıstr órttiń sebebin anyqtaý úshin resmı tergeý bastalǵanyn habarlady.

«Quqyq buzýshylar zań aıasynda eń qatań jazalanatyn bolady — kez kelgen salǵyrttyq jaýapkershiligi qatal qarastyrylady. Men tereń qaıǵyryp, osy qaıǵyly jaǵdaıda barlyq zardap shekken otbasylarǵa shyn júrekten kóńil aıtamyn», dedi Dr. Savant.

Goa — Arab teńizindegi burynǵy portýgalııalyq kolonııa. Onyń túngi ómiri, qumdy jaǵajaılary men demalys oryndary jyl saıyn mıllıondaǵan týrıstterdi ózine tartyp keledi.

Eske sala ketsek, Gonkongtegi órtten qaza tapqandar sany 159-ǵa jetti.