Goa qolma-qol aqshadan bas tartqan alǵashqy Úndistan shtaty bolmaq
ASTANA. QazAqparat - Úndistannyń týrıstik shtaty Goa qolma-qol aqsha qabyldanbaıtyn alǵashqy Úndistan shtaty bolmaq. 31 jeltoqsannan bastap, mundaǵy barlyq tólem uıaly telefon nemese bank kartasy arqyly ǵana júzege asady.
Bul týraly shtattyń bas hatshysy Radjesh Kýmar Shrıvastava málim etti, dep habarlady TASS agenttigi.
«Barlyq tranzaktsııany uıaly teelfon arqyly júzege asyrýǵa bolady nemese satyp alýshyǵa tıesili bank esepshotynan aqsha alynyp otyrady», - dedi Shrıvastava jeksenbilik The Times of India gazetine bergen suhbatynda. Ol bir aıdan keıin Goada ámııan ustaýdyń qajeti bolmaıtynyna jáne ury-qarylardyń múldem joǵalaryna senimdi.
31 jeltoqsannan bastap, shtat aýmaǵynda kez kelgen taýarǵa, tipti balyq pen et, kókónis alý úshin de uıaly telefonnan arnaıy kodty terý kerek. Osy oraıda Shrıvastava bankomattardyń ádettegideı jumys isteýdi jalǵastyratynyn atap ótti, al dúkender men qonaq úılerde nesıelik kartamen tólem jasaýǵa bolady. Shtat aýmaǵynda bankomatpen tólem jasaýǵa tyıym salynbaıdy, degenmen Goa birtindep «aqshasyz qoǵamǵa» aınalýdy kózdep otyr.
Goa - kishigirim 1,5 mıllıon halqy bar aımaq. Alaıda mundaǵy turǵyndardyń jaǵdaıy óte jaqsy - kópshiliginiń bank esepshottary men uıaly telefondary bar. Odan bólek, «jumaq shtat» aýmaǵyna kóptep keletin sheteldik týrıster de nesıelik kartany paıdalanady.
Foto: © AP Photo/Anupam Nath
